Perezida Kagame yasabye Abanyarwanda kudakuka umutima kubera Coronavirus yageze mu Rwanda

Kuri uyu wa Gatandatu tariki 14 Werurwe 2020 nibwo Minisiteri y’Ubuzima mu Rwanda yasohoye itangazo rivuga ko icyorezo cya Coronavirus cyageze mu gihugu, ibi byatumye Perezida wa Repubulika y’u Rwanda, Paul Kagame atanga ubutumwa bwo guhumuriza Abanyarwanda ababwira ko binyuze mu bufatanye no gukorera hamwe bazatsinda ibi bihe bikomeye.

Mu butumwa umukuru w’Igihugu yanyujije ku rubuga rwa twitter yagize ati “Ubwo isi yugarijwe n’icyorezo cya COVID-19, tuzirikane abo imaze kuvutsa ubuzima, imiryango yabo n’inshuti zabo. Duteye ingabo mu bitugu abakora mu nzego z’ubuzima, kandi twifurije abayirwaye bose gukira vuba. Turashimira Ishami ry’Umuryango w’Abibumbye ryita ku buzima (WHO) n’umuyobozi waryo Tedros Adhanom Ghebreyesus bakomeje kutugenda imbere muri ibi bihe.”

Perezida Kagame yakomeje ati “Mu Rwanda hamaze kugaragara umuntu wa mbere wanduye COVID-19. Nk’uko byakomeje kuvugwa, kugira impagarara muri ibi bihe ntacyo byadufasha. Ingamba zisobanutse kandi zihamye ni zo shingiro ryo gukomeza kwirinda ikwirakwiza ry’icyi cyorezo.”

“Gukaraba intoki kenshi, kwirinda kuramukanya, kwirinda kujya ahantu hateraniye abantu benshi kandi tugahagarara ahitaruye, n’ibindi. Turakangurira buri wese gukurikiza amabwiriza ajyanye no kubungabunga ubuzima (nk’uko imigenzo myiza yo kwirinda ibyibutsa)”

Mu gusoza ubu butumwa Perezida Kagame yagize ati “Nkuko bisanzwe, tuzatsinda muri ibi bihe bikomeye binyuze mu bufatanye no gukorera hamwe. Ibi biradusaba kwitwararika twakomeje kwerekana nk’abanyarwanda mu bihe byose twahanganye n’ibibazo kandi tukagera ku musaruro mwiza.”

Perezida Kagame yasabye Abanyarwanda kudakuka umutima kubera Coronavirus.

 

Tanga Igitekerezo ukoresheje Facebook

SHARE