Perezida Kagame yasuye itsinda rikurikirana ibikorwa byo kurwanya ikwirakwira ry’indwara ya coronavirus

Perezida Kagame yasuye itsinda rikurikirana ibikorwa byo kurwanya ikwirakwira ry’indwara ya COVID-19 iterwa n’agakoko ka Coronavirus rigizwe n’abantu 400, arishimira akazi gakomeye riri gukora muri iki gihe rititaye ku kuba ubuzima bwaryo bushobora kujya mu kaga.

Iri tsinda rifite inshingano zirimo gushakisha uwo ariwe wese wagize aho ahurira n’umuntu wanduye Coronavirus, ryatangiye aka kazi tariki 14 Werurwe ubwo umurwayi wa mbere yagaragaraga mu Rwanda.

Rikorera mu Mujyi wa Kigali ahazwi nka Kigali Conference and Exhibition Village [KCEV], hahoze hitwa nka Camp Kigali.

Perezida Paul Kagame yasuye itsinda rishinzwe gushakisha abakekwaho kwandura Coronavirus mu Rwanda (#COVID19 Command Post), abashimira ubwitange bukomeye bari kugaragaza, abizeza ko Leta izakomeza kubaba hafi mu kazi kabo.

Buri muntu aba afite abantu agomba gukurikirana bitewe n’abarwayi bahuye. Ugaragaje ibimenyetso, asabwa kwishyira mu kato mu gihe cy’iminsi 14 yarangira nta kimenyetso ntakomeze gukurikiranwa, iyo agaragaje ibimenyetso agezwa kwa muganga.

Perezida Kagame yasuye iri tsinda ryihariye kuri uyu wa 12 Mata 2020, mu gihe mu Rwanda hamaze kugaragara abarwayi ba Coronavirus 120; 18 bamaze gukira neza basezererwa mu bitaro.

Perezida Kagame yashimiye iri tsinda ku bw’umuhate n’ubwitange ridahwema kugaragaza ritizigamye.

Ati “Mwemeye gukora ibi mutekereza abandi Banyarwanda n’igihugu. Sinabona uko mbashimira. Ndabizi ko muri gukora ku bwo kutikunda, ku bw’urukundo rw’igihugu cyanyu ndetse n’ubunyamwuga. Ibi byose mbishimiye buri umwe wese.”

Perezida Kagame yavuze ko yabonye akazi baba bagomba gukora n’aho u Rwanda ruhagaze mu mibare y’abanduye Coronavirus, avuga ko ibimaze kugerwaho bitari gushoboka iyo abantu batubahiriza amabwiriza yashyizweho yo gufunga ibikorwa bitandukanye.

Ati “Magingo aya, ubuzima bw’igihugu bugomba gusa n’ubuhagaze gato, gusa hari icyizere ko ibintu bizasubira mu buryo. Kandi icyo cyizere gishingiye kuri mwe n’akazi mukora.”

Yabijeje ko Guverinoma izakomeza kubaha ubufasha bushoboka kugira ngo Abanyarwanda basubire mu buzima bwabo busanzwe.

Yabifurije Pasika nziza, ababwira ko hazabaho igihe nyacyo cyo kuyishimira ubwo ibi byose bizaba byarangiye.

Abanyarwanda bakomeje gushishikarizwa kuguma mu ngo mu kwirinda ikwirakwira rya Coronavirus no gukaraba intoki kenshi nka bumwe mu buryo bwo kurwanya ikwirakwira rya Coronavirus.

Tanga Igitekerezo ukoresheje Facebook

SHARE