Perezida Magufuli yasabye Harmonize kuziyamamariza umwanya w’ubuyobozi muri Tanzania

Rajab Abdul Kahali wamamaye muri muzika nka Harmonize yasabwe na Perezida w’igihugu cye cya Tanzania, John Pombe Magufuli ko yaziyamamariza kuyobora kamwe mu duce tugize intara ya Mtwara mu matora azaba umwaka utaha muri iki gihugu.

Kuri uyu wa 15Ukwakira 2019 nibwo Harmonize yatumiwe gususurutsa abanya-Tanzania bari bagiye kwakira no kwumva impanuro za Perezida Magufuri mu gace Likangala.

Ikinyamakuru Mwananchi kivuga ko ubwo Perezida Magufuli yagezaga ijambo ku baturage, yaje gushimira umuhanzi Harmonize maze avuga ko yifuza kuzamubona yiyamamariza kuyobora kamwe mu duce tugize Intara ya Mtwara  ari naho uyu musore avuka.

Yagize ati “Ndashaka gushimira byimazeyo Harmonize, uyu muhungu avuka mu kahe gace? Ndifuza ko Harmonize yaziyamamariza kuyobora Akarere ka Tandaimba.”

Uyu muhanzi asanzwe yigaragaza mu bikorwa bishyigikira Guverinoma ya Perezida Magufuli, yaherukaga gukora indirimbo igaragaza Perezida Magufuli nk’umuyobozi ukunda umurimo kandi wabaye umunyabigwi mu guharanira iterambere.

Mu butumwa yanyujije kuri Instagram, Harmonize nawe yashimiye byimazeyo Perezida Magufuli kuko adahwema kumushyikira anashimira abandi bayobozi bose bagize uruhare kugirango atumirwe kuririmba muri uyu muhango.

 

 

Tanga Igitekerezo ukoresheje Facebook

SHARE