Perezida w’ikipe ya Rayon Sports, yatakambiye Leta ngo ibafashe guhemba abakinnyi muri ibi bihe imikino yahagaze kubera Coronavirus

Perezida w’ikipe ya Rayon Sports, Munyakazi Sadate, yasabye Leta gufasha amakipe kubona ubushobozi bwo guhemba abakinnyi, muri ibi bihe imikino n’ibindi bikorwa bya siporo byasubitswe kubera Coronavirus.

Kuva tariki ya 15 Werurwe 2020, ibikorwa byose bihuza abantu benshi birimo n’imikino byahagaritswe mu Rwanda, mu gihe guhera tariki ya 21 Werurwe, abantu bose basabwe kuguma mu ngo zabo nk’imwe mu ngamba zikomeye zo guhangana n’icyorezo cya Coronavirus.

Perezida w’ikipe ya Rayon Sports, Munyakazi Sadate, yasabye Leta gufasha amakipe kubona ubushobozi bwo guhemba abakinnyi

Umuyobozi wa Rayon Sports, Munyakazi Sadate yasabye ko Leta y’u Rwanda yashyiraho uburyo bwo gufasha amakipe guhemba abakinnyi muri ibi bihe abantu bose basabwe kuguma mu ngo zabo.

Mu butumwa yashyize ku rubuga rwa Twitter, Munyakazi Sadate yagize ati “Minisitiri twashimye ubutumwa, gusa nyuma y’iki cyorezo cyibasiye Isi, hashobora kuzaba ihungabana ry’ubukungu rishobora na gusenya ibigo, kubura akazi bikabona icyuho. Ni yo mpamvu dusaba Leta y’ u Rwanda gufasha amakipe guhemba abakinnyi. “

“Guhemba abakinnyi navuze ni muri iki gihe abantu basabwe kuguma mu ngo zabo kugera igihe ibikorwa bya siporo bizasubukurirwa. Murakoze.”

Rayon Sports iri mu makipe atatu adafashwa na Leta muri 16 akina Shampiyona y’icyiciro cya mbere mu Rwanda, ndetse 90% by’amafaranga ikoresha atangwa n’abafana bayo.

Iyi kipe ikoresha hafi miliyoni 32 Frw ku kwezi, iherutse guha abakinnyi bayo bo mu ikipe ya mbere n’iy’abato ibihumbi 50 Frw byo kwifashisha muri ibi bihe bya Coronavirus, mu gihe ubuyobozi buvuga ko bukomeje gushaka igisubizo ku mishahara uhereye ku ya Gashyantare.

Tanga Igitekerezo ukoresheje Facebook

SHARE