Perezida w’u Bufaransa, Emmanuel Macron,yagiriye uruzinduko i Beirut ahapfuye abagera ku 137, avugirizwa induru.

Perezida w’u Bufaransa, Emmanuel Macron, yagiriye uruzinduko i Beirut muri Liban, yakirizwa ibibazo uruhuri ndetseavugirizwa induru. 

Macron yari muri Liban mu rwego rwo gufata mu mugongo icyo gihugu cyashegeshwe bikomeye n’iturika ryahitanye abagera ku 137, rigakomeretsa abarenga 5000 mu gihe ibikorwa remezo byinshi cyane by’i Beirut byangiritse nyuma y’iturika rikomeye ryahabereye ku wa 4 Kanama 2020.

Perezida Macron yasezeranyije abaturage inkunga, avuga ko igihugu cye kizakora uko gishoboye kigafasha Liban kandi ko ‘inkunga azatanga itazaruhukira mu maboko y’abaryi ba ruswa’ imwe mu ngingo yakunze gushora abaturage mu mihanda bamagana Leta.

Yasuye agace kabereyemo iturika, abaturage bamubwira ko ‘Leta ibayobora ari abaterabwoba’.

Iri turika rifatwa nk’uburangare bwa Leta ya Liban, ryatewe n’ibihumbi by’amatoni y’ibiturika byo mu bwoko bwa ammonium nitrate byari bibitse mu nzu yari ku cyambu cya Liban bihamaze imyaka itandatu.

Hari ubutumwa bwinshi bwagiye bugaragaza ko Leta yari izi ko ibyo biturika bihari, kandi ko bifite ingaruka mbi biramutse bidacunzwe.

Itangazo ryaturutse mu Biro bya Minisitiri w’Intebe wa Liban, Hassan Diab, rivuga ko “ibi biturika bitari bibitswe mu buryo bwemewe n’amategeko.”

Iturika ryabereye Beirut ryateje umutingito uri ku gipimo cya 3.3, wumvikanye muri Cyprus, mu bilometero birenga 220 uvuye muri Liban.

Inzu ziri mu birometero 10 uvuye ku cyambu na zo zangiritse, ndetse 90% bya hoteli zose ziri Beirut zangiritse, nk’uko byatangajwe na Minisitiri w’Ubukungu, Raoul Nehme.

Habarwa ko ibikorwaremezo byangiritse bifite agaciro ka miliyari $10. Leta yatanze iminsi ine ngo iperereza ry’ibanze rigaragaze impamvu y’iturika ndetse abayobozi benshi b’icyambu cya Beirut bamaze gufungirwa mu ngo zabo mu gihe rigikomeje.

Tanga Igitekerezo ukoresheje Facebook

SHARE