Polisi yahagaritse igitaramo Tuff Gang yakoreraga kuri Youtube, ihita ibajyana kurara kuri stade

Mu ijoro ryo kuri uyu wa Gatandatu tarikiya 23 Gicurasi 2020 nibwo itsinda rya Tuff Gang bari bateguriye abakunzi babo igitaramo cyaberaga mu rugo ariko bakagikurikiranira ku rubuga rwa Youtube. Nyuma y’umwanya muto gitangiye Polisi yahise igihagarika ndetse aba bahanzi bafatwa nk’abarenze ku mabwiriza yo kwirinda icyorezo cya Covid-19.

Iki gitaramo cyari cyateguwe na MK1 TV ikorera kuri youtube ari naho cyatambutswaga live, cyagombaga kuririmbano abaraperi bahoze bagize itsinda rya Tuff Gang bose uko ari batanu;  Bull Dogg, Green P, Fireman, P-Fla na Jay Polly.

Ubwo iki gitaramo cyari kigitangira hamaze kuririmba Green P, Bull Dogg na Fireman buri wese indirimbo ebyiri, umunyamakuru wa RBA, Lucky wari ukiyoboye yagarutse yihanganisha abari bagikurikiye ababwira ko gisubitswe kubera ikibazo giturutse ku mabwiriza yo kwirinda Covid-19.

Amakuru agera ku IBYAMAMARE.Com avuga ko aba bahanzi ndetse n’abandi bose bari Kicukiro mu rugo cyari kirimo gukorerwa barenze ku mabwiriza yo kwirinda Covid-19.

Aho iki gitaramo cyaberaga hari hato, hegeranye kandi abari aho bari benshi ku buryo nta ntera ya metero yari iri hagati y’abantu ndetse hari n’abatari bambaye udupfukamunwa. Usibye itsinda ry’abacurangiraga gusa, abandi bose nta dupfukamunwa bari bambaye kandi bagahererekanya indangururamajwi, ibintu bihabanye cyane n’amabwiriza yo kwirinda Covid-19.

Aba bahanzi n’abandi bari aho bose bakaba bahise bajyanwa kuri stade ya IPRC Kicukiro ahajyanwa abarenze ku mabwiriza yo kwirinda Coronavirus mu karere ka Kicukiro ubundi bakigishwa nyuma bakarekurwa.

Aba basore bagize Tuff Gang ni ubwambere bari bagiye kongera guhurira ku rubyiniro bose nyuma yuko hafi ya bose banyuze muri gereza zitandukanye n’ibigo ngororamuco.

Iri tsinda ryari rikumbuwe na benshi.
Ikirango cyamamaza iki gitaramo.

 

 

 

Tanga Igitekerezo ukoresheje Facebook

SHARE