Polisi y’u Rwanda yamufashe amaze gutanga ibihumbi 200 kugira ngo bamufungurire inshuti ze ebyiri zifunzwe, nawe ahita abasanga muri gereza

Polisi y’u Rwanda yatangaje ko ku Cyumweru yafatiye mu Murenge wa Mahama mu Karere ka Kirehe, umugabo w’imyaka 38, agerageza guha umupolisi ruswa ingana n’amafaranga y’u Rwanda ibihumbi 200.

Ngo yatangaga aya mafaranga kugira ngo bamufungurire inshuti ze ebyiri ziherutse gufungwa kubera ikoreshwa ry’ibiyobyabwenge n’ubucuruzi bwa magendu.

ikorimana Jean Claude w’imyaka 38, yafashwe agerageza guha umupolisi ruswa ingana n’amafaranga y’u Rwanda ibihumbi 200

Umuvugizi wa Polisi mu Ntara y’Iburasirazuba, CIP Hamdun Twizeyimana, avuga ko uwo mugabo akimara kumenya ko inshuti ze zafunzwe yahise atangira gushaka gutanga ruswa ngo arebe ko bafungurwa, birangira na we abasanzemo.

Yagize ati “Yatangiye ahamagara abapolisi kugira ngo baganire uko yabaha amafaranga bagafungura ziriya nshuti ze. Yemereye umupolisi amafaranga y’u Rwanda ibihumbi 200, umupolisi yagombaga kuyaha ni we watanze amakuru, afatirwa mu cyuho arimo kuyamuha.”

CIP Twizeyimana yakanguriye abantu kwirinda gutanga ruswa cyangwa gushaka izindi nzira z’i busamo kugira ngo babone ibyo batagenewe cyangwa kwica amategeko.

Ati “Igihe cyose hari umuntu wakoze icyaha agafungwa, ntabwo icyihutirwa ari ugushaka uko utanga ruswa kugira ngo bagufungurire umuvandimwe cyangwa inshuti, utegereza icyo amategeko ateganya, bitari ibyo ushobora gusanga nawe ukoze ibyaha.”

Itegeko rihana icyaha cya ruswa riteganya ko umuntu wese usaba, utanga cyangwa wakira mu buryo ubwo ari bwo bwose, indonke iyo ari yo yose, iyo abihamijwe n’urukiko ahanishwa igifungo kirenze imyaka itanu ariko kitarenze imyaka irindwi, n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.

Tanga Igitekerezo ukoresheje Facebook

SHARE