PSG yaserukanye bwa mbere umwambaro wamamaza Visit Rwanda ku mukino yatsinzemo Nantes (Amafoto)

Nyuma yuko ikipe ya Paris Saint Germain igiranye amasezerano y’ubufatanye n’Ikigo cy’Igihugu cy’iterambere RDB  bwo kumenyakanisha ubukerarugendo bw’u Rwanda n’ibihakorerwa, abakinnyi b’iyi kipe baserukanye bwa mbere umwambaro wanditseho Visit Rwanda ku mukino wa shampiyona batsinzemo Nantes 2-0.

Visit Rwanda mu mugongo wa Kylian Mbappé.

Mu bikubiye muri aya masezerano azamara imyaka itatu, harimo kuba ikirango cya Visit Rwanda kizajya kigaragazwa kuri Stade ya Parc des Princes aho PSG yakirira imikino yayo, abakinnyi b’iyi kipe bakazajya bambara ikirango cya Visit Rwanda ku mugongo ku myenda bakoresha mu myitozo no mu gihe cyo kwishyushya mbere y’imikino.

Mu ijoro ryo kuri uyu wa Gatatu ku mukino ikipe ya PSG yari yakiriyemo Nantes, niwo wabaye uwambere abakinnyi bayo baje kwishyushya bambaye imipira y’umweru iriho amagambo ‘’Visit Rwanda’’ mu mugongo.

Muri Stade Parc des Princes hejuru hari handitsemo amagambo ’’Visit Rwanda’’ ndetse yanatambukaga ku byapa byamamaza biba biba iruhande rw’ikibuga.

Muri aya masezerano kandi harimo ko guhera umwaka utaha w’imikino icyayi cy’u Rwanda n’ikawa aribyo byonyine bizajya bicuruzwa muri stade ya Parc des Princes ya PSG.  Iyi kipe izajya inategura icyiswe “Semaine du Rwanda à Paris” icyumweru cyo kumenyekanisha ibikorerwa mu Rwanda (Made in Rwanda) mu mujyi wa Paris.

Paris Saint Germain yo mu Bufaransa ibaye ikipe ya kabiri ikomeye ku Isi igiranye ubufatanye na Leta y’u Rwanda nyuma ya Arsenal yo mu Bwongereza.

Neymar na Marquinhos bishyushya mu mwabaro wamamaza Visit Rwanda mbere y’umukino Paris Saint Germain yakiriyemo Nantes.

Visit Rwanda yamamazwaga muri Stade Parc des Princes ya PSG i Paris.

 

Tanga Igitekerezo ukoresheje Facebook

SHARE