Rayon Sports yashyize ahagaragara abakinnyi batatu bazatorwamo uwahize abandi mu Ukwakira

Bimaze kumenyerwa ko buri mpera z’ukwezi mu ikipe ya Rayon Sports hatoranywa umukinnyi uba yaritwaye neza kurusha abandi, agahembwa n’uruganda rwa Skol rufatanyije na March Generation. Nizeyimana Mirafa, Kimenyi Yves na Mugisha Gilbert nibo bazatoranywamo uwahize abandi mu Ukwakira.

Igikorwa cyo guhemba umukinnnyi w’ukwezi muri Rayon Sports gitegurwa n’Uruganda rwenga ibinyobwa rwa SKOL rusanzwe ari umuterankunga w’iyi kipe rufatanyije na March Generation Fan Club, rimwe mu matsinda y’abafana ba Rayon Sports.

Umunyezamu Kimenyi Yves utarinjizwa igitego na kimwe mu mikino amaze gukina muri shampiyona ya 2019-2020 yashyizwe ku rutonde rw’abahabwa amahirwe yo kuba umukinnyi w’ukwezi.

Umukinnyi wo hagati Nizeyimana Mirafa bigaragara ko muri iyi minsi ameze nk’aho ari we moteri w’iyi kipe, dore ko agerageza kuyifasha mu bwugarizi ndetse no mu busatirizi nawe ari kuri uru rutonde.

Undi mukinnyi uri kuri uru rutonde ni Mugisha Gilbert ukina nka rutahizamu, kugeza ubu akaba ari nawe umaze gutsindira Rayon Sports ibitego byinshi muri shampiyona aho afite 2.

Ibirori byo gutanga iki gihembo biteganyijwe kuwa Gatanu tariki ya 9 Ugushyingo 2019 kuri La Palisse Hotel i Nyandungu, saa 17:00.

Nizeyimana Mirafa umukinnyi wo hagati mu ikipe ya Rayon Sports.
Mugisha Gilbert myugariro wa Rayon Sports.
Umunyezamu Kimenyi Yves

Tanga Igitekerezo ukoresheje Facebook

SHARE