Rayon Sports yirukanye rutahizamu, Michael Sarpong bamuziza gusebya umuyobozi w’iyi kipe

Ubuyobozi bw’ikipe ya Rayon Sports bwafashe umwanzuro wo kwirukana rutahizamu w’iyi kipe ukomoka mugihugu cya Ghana, Michael Sarpong bamushinja kuvuga amagambo asebya umuyobozi w’iyi kipe.

Mu minsi ishize nibwo, rutahizamu wa Rayon Sports , Michael Sarpong yumvikanye mu itangazamakuru avugako Perezida w’iyi kipe ari we Sadate Munyakazi adafite ubushobozi bwo kuyobora iyi kipe.

Ati “…Ntabwo akwiye kuyobora iyi kipe y’ubukombe. Iyi kipe ikomeye ikeneye umuntu ukuze bihagije mu mutwe, ushobora kuganira n’abakinnyi. Sinkeka ko nabakinnyi bifuza ko aguma ku mwanya ariho ubu. Ndakeka abakinnyi batamwifuza ubu.” aha yaganiraga na Royal FM.

Ubuyobozi bw’ikipe ya Rayon Sports bwafashe umwanzuro wo kwirukana rutahizamu w’iyi kipe ukomoka mugihugu cya Ghana, Michael Sarpong

Kuri uyu wa kane tariki ya 23 Mata 2020, ubuyobozi bw’iyi kipe bwandikiye Sarpong ibaruwa bumusaba ibisobanuro kuri aya amagambo yatangaje avuga ku muyobozi w’iyi kipe.

Iyi baruwa yashyizweho umukono na Perezida wa Rayon, Sadate Munyakazi yibutsa uyu rutahizamu w’Umunya-Ghana ko hari ibindi bisobanuro yatswe inshuro ebyiri ntabitange.

Ibi bisobanuro birimo icyo yatswe ubwo yataga akazi adasabye uruhusa kuva tariki ya 23 Mutarama 2020 kugeza tariki ya 28 Gashyantare 2020 ndetse n’icyo kuba yaragiriye urugendo muri Norvege agiye kuganira n’amakipe yo muri kiriya gihugu.

Uyu rutahizamu uherutse kujya gukora igeragezwa mu Bushinwa, ariko akaza kugaruka mu Rwanda kubera icyorezo cya Coronavirus cyari Kimaze kuyogoza ubushinwa.

Ni umwe mu bakinnyi ba Rayon batishimiye icyemezo cyafashwe n’Ubuyobozi bw’iriya kipe cyo guhagarika imishahara y’abakinnyi bayo kuva mu kwezi kwa Werurwe kugeza igihe impande zombi zizongera kubahiriza inshingano.

Sarpong ni umwe mu bakinnyi bakanyujijejo muri iyi kipe isanzwe ifite abafana banshi kubera ibitego yagiye atsindira iyi kipe ifite igikombe cya Shampiyona ya 2018-2019.

Tanga Igitekerezo ukoresheje Facebook

SHARE