RIB yafashe, umuyobozi w’umurenge n’aba DASSO bagaragaye mu mashusho bahorandagura umukobwa n’umuhungu kuko batambaye agapfukamunwa

Urwego rw’Igihugu rw’Ubugenzacyaha RIB rwafashe, umuyobozi w’umurenge n’aba DASSO bagaragaye mu mashusho bahorandagura umukobwa n’umuhungu kuko batambaye agapfukamunwa i Musanze

Umunyamabanga Nshingwabikorwa w’Umurenge wa Cyuve mu Karere ka Musanze, Sebashotsi Gasasira Jean Paul; na bamwe mu barinda umutekano bazwi nka DASSO, bagaragaye mu mashusho bakubita abaturage ibibando, batawe muri yombi.

Urwego rw’Igihugu rw’Ubugenzacyaha ruravuga ko uriya muyobozi w’Umurenge afunganywe n’Umunyamabanga Nshingwabikorwa w’Akagari ka Kabeza, Tuyisabimana Jean Leonidas na ba DASSO Nsabimana Anaclet na Abiyingoma Sylvain.

Urwego rw’Igihugu rw’Ubugenzacyaha RIB rwatangaje ko abagaragaye muri video yafatiwe mu karere ka Musanze bakubita abaturage batambaye udupfukamunwa bari gukurikiranwa ndetse ngo bafungiye kuri sitasiyo ya Muhoza.

Aba bagabo batawe muri yombi nyuma y’uko ejo hashize ku mbuga nkoranyambaga hiriwe hacicikana amashusho ya bariya bagabo bakubitana ubugome abaturage ari bo Dushime Jean Baptiste na Nyirangaruye Uwineza Clarisse.

Bivugwa ko bariya baturage bakubiswe na bariya bayobozi ngo kuko batambaye udupfukamunwa nk’imwe mu ngamba yashyizweho yo kwirinda ikwirakwira ry’icyorezo cya COVID-19.

Aba bagabo bafungiye kuri Station y’Urwego rw’Igihugu rw’Ubugenzacyaha (RIB) ya Muhoza mu karere ka Musanze.

RIB ivuga ko bakurikiranyweho icyaha cyo gukubita no gukomeretsa gihanwa n’ingingo y’ 121 y’itegeko Nº68/2018 ryo ku wa 30/08/2018 riteganya ibyaha n’ibihano muri rusange

Tanga Igitekerezo ukoresheje Facebook

SHARE