RIB yahamijeko Barafinda afite ibibazo byo mu mutwe byabaye karande, abamukoresha ibiganiro baziko arwaye nabo bishobora kubakoraho

Umunyamabanga Mukuru w’Urwego rw’Ubugenzacyaha, RIB, Rtd Col Ruhunga Jeannot, yatangaje ko abaganga bemeje ko uburwayi bwa Barafinda Sekikubo Fred ari karande, asaba abakomeza kumukoresha ibiganiro bazi ko arwaye, kubihagarika.

Muri Gashyantare nibwo RIB yahamagaje Barafinda Fred ngo ayitabe ku cyicaro gikuru cyayo kugira ngo agire ibyo abazwa, nyuma y’igihe kuri YouTube hanyuzwa ibiganiro byinshi akoreshamo imvugo ziganisha ku byaha ashobora gurikiranwaho.

Col Ruhunga yabwiye abanyamakuru kuri uyu wa Kabiri, ko batangiye kumubaza baketse ko afite uburwayi, bitabaza abaganga.

Yakomeje ati “Tumufashe dutangiye kumubaza, dusanga ko afite ibibazo mu mutwe, ko ibyo avuga ubona ko hari ikibazo kirimo. Twifashisha ibitaro bishinzwe gusuzuma indwara zo mu mutwe, agezeyo baramwakira, baramusuzuma, batubwira ko koko afite ikibazo kigendanye n’indwara yo mu mutwe amaranye igihe, abaganga baza kutubwira ko indwara ari karande, ko ari ukumugabanyiriza ubukana gusa ariko ari ibintu amaranye igihe kandi bishobora kuzakomeza.”

Umunyamabanga Mukuru w’Urwego rw’Ubugenzacyaha, RIB, Rtd Col Ruhunga Jeannot, yatangaje ko abaganga bemeje ko uburwayi bwa Barafinda Sekikubo Fred ari karande

Yavuze ko ikintu cyamutangaje ari uko amaze kuva muri ibyo bitaro bya CARAES Ndera, hari imbuga za YouTube n’ibinyamakuru byakomeje kumukoresha ibiganiro kandi babizi ko afite ubumuga, ugasanga bashimishijwe n’uburyo asubiza ibintu nk’ufite ubumuga.

Yasabye abamukoresha ibiganiro kugira ubumuntu no gushyira mu gaciro, kuko iyo umuntu afite ibibazo, ibyo bibazo atari byo bikwiriye gucuruzwa muri ibyo biganiro ngo abantu bakunde babirebe.

Yakomeje ati “Mushobora no kugera ku rwego namwe mushobora gukurikiranwa n’amategeko, ni nko kujya ku, niba nabyita gushyinyagura, umuntu niba muganga yavuze ko arwaye, kuki ushaka kujya kumukoresha muri ubwo burwayi bwe ngo umucuruze?”.

Barafinda yibukwa cyane ubwo yatunguranaga ajyanye kandidatire mu matora y’umukuru w’igihugu yabaye muri Kanama 2017, ariko Komisiyo y’Igihugu y’Amatora igasanga atujuje ibisabwa.

Tariki 13 Kamena 2017, Barafinda yabwiye itangazamakuru ko yigeze kumara igihe avurirwa i Ndera ahakurikiranirwa abafite indwara zo mu mutwe, ariko ntiyasobanuye igihe yagiriyeyo cyangwa uko yahavuye. Yakunze kuvuga ariko ko imiti bamuhaye atayinyoye.

Tanga Igitekerezo ukoresheje Facebook

SHARE