Search

RMC yasabye RURA gufunga ‘Radio Amazing Grace’ kubera umupasiteri uherutse gusebya abagore abinyujije kuri iyi Radio

IBM Radio Listen Live

KANDA HANO UREBE VIDEO

 Mu inama y’Abanyamakuru bigenzura (RMC),uru rwego  rwasabye Ikigo k’Igihugu gishinzwe kugenzura imirimo imwe n’imwe ifitiye igihugu akamaro (RURA) gufunga by’agateganyo Radio Amazing Grace Christian Radio amezi atatu izira kuba yarahaye urubuga umuvugabutumwa witwa Niyibikora Nicolas akigisha yibasira abagore , ndetse yo na Pasiteri Niyibikora bagasaba imbabazi Abanyarwanda mu nyandiko.

Hashingiwe ku ngingo ya 30 n’iya 31 mu mategeko ngengamyitwarire agenga umuwuga w’itangazamakuru, RMC yategetse Niyibikora gusaba imbabazi Abanyarwanda bose n’abagore by’umwihariko mu gihe kitarenze amasaha 48.

RMC kandi yategetse ko RURA yaba ihagaritse Amazing Grace Christian Radio by’agateganyo mu gihe cy’amezi atatu ndetse nayo ikandika ibaruwa isaba imbabazi Abanyarwanda mu gihe kitarenze amasaha 48.

Impamvu ihagaritswe ni uko ngo itagira Umuyobozi w’ibiganiro ubasha kumva ibivugirwa kuri iyo radiyo mu ndimi zikoreshwaho, ikaba inavugwaho imikorere itanoze.

Mu cyumweru gishize, Perezidente w’Ihuriro ry’imiryango y’abagore itegamiye kuri Leta “Pro-Femmes Twese Hamwe”, Jeanne D’Arc Kanakuze yasabye Police gufata Pasiteri Nicholas Niyibikora uherutse kuvugira kuri Radio Amazing Grace amagambo abagore bavuga ko yabatesheje agaciro.

Iki kirego cyaje no kujyanwa Urwego rw’Abanyamakuru bigenzura (RMC) nk’urwego rushinzwe kugenzura imikorere y’itangazamakuru mu Rwanda.

Ku gicamunsi cyo kuri uyu wa mbere, RMC yumvise “Pro-Femmes Twese Hamwe” irega, ndetse n’abaregwaga, ni ukuvuga Radio Amazing Grace na Pasiteri Nicholas Niyibikora, uyu ariko utagaragaye ngo yisobanure.

 

Jeanne d’Arc Kanakuze wavugiye abarega yavuze ko muri iki gihe uriya mu Pastori yavanyeho telephone ye akaba atakiboneka.

Kanakuze yongeye gushimangira ko inyigisho ya Pastori Niyibokora ari rutwitsi, incamugongo kandi yigisha kwanga umugore no kumwambura agaciro.

Ati “Twe twasanze RMC yabaza iriya radio impamvu yahaye uriya muntu umwanya ungana kuriya asebya abagore.  Turasaba ko mushaka igihano gihabwa iriya radio. Hakorwe igikwiye.”

Gregory Brian Schoof umunyamerika nyiri iyi Radio yavuze ko azi neza ko ibyo Pastori Nicolas yavuze bibabaje.

Ati “Mu cyumweru gishize nibwo numvise neza ibyo yavuze nsabye bagenzi banjye kubinshyirira mu cyongereza. Ibyo yavuze biteye ubwoba. Idini rya gikirisitu ry’ukuri ryubaha abagore

Avuga ko bamubwiye ko uyu mupastori yagiye kuri Radio gusaba imbabazi gusa ngo ntibihagije kuko abamureze kuri RMC batabyumvise.

Yasobanuye ko ikosa ryatewe n’uko muri iyi minsi Radio ye nta mugenzuzi wa gahunda ifite kuko nta mafaranga yari afite muri iki gihe.

Pastori Niyibikora yari amaze imyaka umunani (8) yigisha kuri iyi Radio

Nyuma yo kumva impande zose, Abakomiseri ba RMC banzuye ko Radio Amazing Grace ibyayikoreweho bihembera urwango kandi bisebya igice kimwe cy’abanyarwanda, ibintu bihabanye n’amahame ngengamwitwarire y’itangazamakuru mu Rwanda.

Iyi radio ngo yari yarihanangirijwe inshuro irenze imwe, na kimwe mu biganiro byayo giherutse guhagarikwa kubera guhembera urwango n’amacakubiri ashingiye ku idini.

RMC ko iba ifunzwe by’agateganyo kandi ikandika isaba imbabazi Abanyarwanda by’umwihariko abagore mu nyandiko bakayishyiriza RMC ikaba ariyo izabitangariza Abanyarwanda. Ibi ikabikora mu gihe kitarenze amasaha 48.

Naho, Pasiteri Nicholas Niyibikora yasabwe kwandika ibaruwa isaba imbabazi umuryango nyarwanda wose kuko ibyo yavuze bitesha agaciro igice kimwe cy’abawugize (abagore).

Iyi baruwa agomba kuzayishyikiriza RMC ikaba ariyo iyisomera Abanyarwanda. Ibi kandi ngo bigomba gukorwa mu gihe kitarenze amasaha 48.

Umuvugabutumwa Nicolas ntiyagaragaye muri uru rubanza rwo muri RMC, ngo yahamagaye kuri telefoni ye ntiyaboneka.

 

Richard [email protected]

 

Comments

comments




Leave a Reply

Your email address will not be published. Required fields are marked *