Robots zigiye kwifashishwa mu gupima no kwita ku barwaye Coronavirus zahawe amazina y’Ikinyarwanda

Kuri uyu wa kabiri tariki 19 Gicurasi 2020 nibwo Minisiteri y’Ubuzima (MINISANTE) yashyikirijwe Robots eshanu zizakoreshwa  mu gupima umuriro, gukurikirana abarwaye Coronavirus no kubika amakuru yabo.

Izi robots Minisiteri y’Ikoranabuhanga na Inovasiyo ni yo yazishyikirije MINISANTE ku bufatanye n’Ishami ry’Umuryango w’Abibumbye rishinzwe Iterambere (UNDP), zikaba zarahawe amazina y’Ikinyarwanda ari yo: Akazuba, Ikizere, Mwiza, Ngabo, na Urumuri.

Muri iki gikorwa cyabereye ku kigo cya Kanyinya kivurirwamo abanduye Coronavirus, minisitiri w’Ubuzima, Dr. Daniel Ngamije yavuze ko izi robots zizihutisha imitangire ya serivisi kandi zitume abaganga badahura n’ibyago byo kwandura Coronavirus.

Izi robots zifite ubushobozi bwo gufata ibipimo abantu bari hagati ya 50 na 150 mu munota umwe, kugeza ibiribwa n’imiti ku barwayi mu byumba barwariyemo, gufata amakuru yabo no kumenyesha umuganga igihe hari ibimenyetso bidasanzwe umurwayi agize.

Kugeza ubu mu Rwanda abanduye Coronavirus bamaze kugera kuri 308, nta n’umwe irahitana mu gihe 209 bayikize, abandi 99 bakaba bakiri kwitabwaho n’abaganga.

Izi Robots zahawe amazina y’Ikinyarwanda.
Robots eshanu zigiye kwifashishwa mu buvuzi bw’abarwaye Coronavirus.

 

 

 

Tanga Igitekerezo ukoresheje Facebook

SHARE