Rubavu: Abafite ubumuga bakoze Filime igaragaza ko bashoboye

Abafite Ubumuga bo mu karere ka Rubavu babarizwa muri Ubumwe Community Center bashyize hanze Filime bise ” Barashoboye ubikoraho iki ?” itanga ubutumwa bwo guha agaciro abafite ubumuga mu ngeri zitandukanye.

Iyi Filime ikinwa mu bice bitandukanye bitewe n’ikigamijwe, itanga ubutumwa butandukanye ariko ikibanda cyane ku buzima bw’abafite ubumuga.Iheruka gusohoka ni iyageze kuri youtube kuri uyu wa gatandatu tariki 25 Mata 2020.

Iyi filime ngufi yasohotse kuri iyi nshuro ifite iminota 16 n’amasegonda 36, iba igaragaza uburyo mu muryango mugari w’abantu hari abagiheza abafite ubumuga muri gahunda za leta kandi ari uburenganzira bwabo nk’abandi bose.

Muri iyi Filime igaragaramo uwitwa Mukakalisa usanzwe ufite ubumuga bwo kutabona akina agaragaza uko yimwe agaciro muri gahunda zo kwandikwa mu gitabo cy’irangamimerere no guhabwa ubwisungane mu kwivuza.

Hanagaragaramo ukina yitwa Nyiramararo uba ari umubyeyi wa Mukakalisa aho aba avuga ko nta mpamvu yo kwita ku muntu ufite ubumuga kuko ntacyo amaze gusa birangira abonye ko abafite ubumuga ari abantu bakomeye cyane hari ibyo bashoboye bakwiriye no gushyigikirwa.

Iyi Filime igaragara kuri Youtube Channel ya Ubumwe Community Center Tv aho usangaho n’ibindi bikorwa bya Ubumwe Community Center ikigo gifasha abafite ubumuga butandukanye.

Tanga Igitekerezo ukoresheje Facebook

SHARE