Rubavu: Barataka inzara nyuma yo kwandikwa ntibahabwe ibiribwa byo kubagoboka

Ubufasha bwo kugoboka abaturage bagizweho ingaruka n’icyorezo cya Coronavirus buri gutangwa hirya no hino mu Gihugu. Gusa mu Karere ka Rubavu benshi barataka inzara bagashinja inzego z’ibanze kubarangarana.

Aba baturage bavuga ko bubahirije Gahunda ya Guma Murugo  ntibiyumvisha ukuntu inzara yenda kubatsinda mu mazu kandi bumva ku maradiyo Leta y’Urwanda yaratanze inkunga y’ingoboka  yo gufasha abatishoboye bakibaza ukuntu bo nta kintu barahabwa.

Abo baturage bo mu mirenge itandukanye akababaro kabo basigaye bagatura itangazamakuru nko mu kiganiro cyitwa “Zinduka” cya Radiyo 10.Abanyarubavu ntibasiba guhamagara bataka inzara basaba ubuyobozi kubagoboka kuko barembejwe no kubura icyo kurya.

Umuturage wanze ko dutangaza amazina ye utuye mu murenge wa Gisenyi yabwiye Abanyamakuru ko ikibazo cyo kubura icyo agaburira umuryango kimaze kumubera umutwaro ukomeye kandi nyamara yaranditswe kw’ikubitiro mu bagomba guhabwa inkunga y’ingoboka.

“Kubura icyo ngaburira umuryango bimaze kumbera umutwaro ukomeye, nta kabuza inzara iradutsinda mu nzu. twaranditswe ariko amaso yaheze mu kirere turibaza aho bizaherera bikatuyobera. batugoboke inzara itumereye nabi”

Undi muturage utuye mu murenge wa Rugerero nawe avuga ko yaherutse yandikwa na Mutwarasibo ariko akaba yarategereje ibiribwa agaheba. nyamara anatunga urutoki inzego z’ibanze aho zitanga ibiryo rwihishwa.

“Bazengurutse mw’ISIBO batwandika ariko byahereye aho nta biribwa baduhaye ntibanaduhakanira ko byabuze. gusa tubabazwa n’uburyo hari aho bitwikira ijoro Mudugudu agahamagara umuntu kuri Telefone bakamuha ibyo kurya abandi ntibaduhe harimo amanyanga menshi “

Bamwe mu bayobozi bo mu nzego z’Ibanze bahamya ko abaturage bashonje ,gusa ngo bakoze intonde z’abagomba gufashwa zishyikirizwa ubuyobozi bubakuriye ngo inzego zo hejuru ziri kubakorera ubuvugizi

Uyu yagize ati : ”Badusabye gukora urutonde rw’abakeneye ubufasha kurusha abandi, turarukora yewe tunararutanga, dutegereza ko babiduha turaheba. Ubu rero abaturage ni twe bari kwitwaramo inabi ngo barabitanze ntitwabibaha kandi si byo. Natwe ntabwo twakwemera ko abaturage bacu bicwa n’inzara. Iyo tubajije abayobozi bacu badukuriye batubwira ko bari kudukorera ubuvugizi, tukihanganisha abaturage bacu, ariko ikintu nanjye nzi ni uko abaturage bacu bashonje pe”.

Bamwe mu bayobozi bo mu nzego z’ibanze bavuga ko ibyo abaturage bavuga ko baha ibyo kurya abantu bamwe abandi bakabibima biterwa n’ibiribwa bicye bahabwa n’abagiraneza maze bakabigabanya mu baturage ariho usanga utagezweho yijundika abayobozi nyamara baba batabitwaye mu ngo zabo.

Nzabonimpa Deogratias Visi Mayor uushinzwe ubukungu yavuze ko ubuyobozi bw’Akarere bugiye kureba ahari ikibazo maze abaturage bafashwe na cyane ko ubuzima butoroshye muri ibi bihe bya Coronavirus kuri bamwe baryaga bavuye guca inshuro.

Yagize ati ”Abatishoboye bose baranditswe bandikwa hataragaragara amabwiriza agenga uburyo bwo gutanga ibyo kurya, nyuma rero haje kumenyekana amabwiriza, hafashwa abababaye kurusha abandi. Ntabwo duha abaturage bose ijana ku ijana duhera ku bo hasi, ni nayo mpamvu hariho abataragerwaho.”

Uyu muyobozi akomeza avuga ko bagiye gukora uko bashoboye ngo bagoboke abaturage gusa asaba abayobozi bahorana n’abaturage kujya batanga amakuru hakiri kare

“Kuba rero hariho imidugudu imwe n’imwe itaragerwaho turareba uko tubikora nabo tubagereho, tubafashe, gusa abayobozi babana nabo bari bakwiye kujya bakurikirana ibibazo by’abaturage bayoboye bakabigeza ku nzego bireba bigakemurwa. Sinkeka ko byagafashe igihe kingana gutya kandi abaturage turabihanganisha tubizeza ko tubikurikirana nabo bagafashwa”.

Deogratias Nzabonimpa Visi Mayor ushinzwe ubukungu avuga ko abaturage bagiye gufashwa kubona ibiribwa

Abaturage barasabwa kuguma gukurikiza amabwiriza yo kwirinda kwandura n’ikwirakwira ry’icyi cyorezo bubahiriza gahunda ya Guma murugo, gukaraba intoki n’amazi meza n’isabune, kwirinda kuramukanya no guhoberana n’ibindi byabatera kwandura Coronavirus.

 

Tanga Igitekerezo ukoresheje Facebook

SHARE