Rubavu : Ikiganiro na WEST umucuruzi wananiwe kuba umuhanzi akihebera gufasha Abahanzi

Uwavuga ko El Classico ari mu hantu hafasha Abahanzi Nyarwanda by’umwihariko abo mu karere ka Rubavu kwegerana n’abakunzi babo , ko El Classico Beach hari mu hagezweho hataramirwa na benshi mu nkengero z’ikiyaga cya Kivu ntiyaba abeshye. Igitekerezo, imishinga n’ibikorwa byose biri mu maboko y’umuntu umwe, Nshimiyimana Onesphore uzwi nka West El Classico.
 

Onesphore Nshimiyimana  yinjiye mu bucuruzi bw’utubari ku mazina ya  West El Classico, ari muri bari gukangaranya benshi kubera kwigarurira abakiliya mu bijyanye n’ubucuruzi bw’utubari akora , ntagira ubugugu mu kazi akora ,asangira na bose n’umwe mu batangiye gushidikanywaho aho avoma ubukungu cyane cyane ashora mu bahanzi bo mu karere ka Rubavu.

Iyo muganira akubwira ko amaze imyaka myinshi mu bucuruzi bw’utubari  ndetse ko kera yigize gushaka kuba umuhanzi ntibyamuhira ariyo ntandaro y’ibikorwa afashamo abahanzi birimo kubaha aho bakorera ibitaramo,kubishyurira indirimbo n’ibindi bikorwa bitandukanye bibateza imbere.

N’umugabo ufite ibikorwa by’ubucuruzi mu karere ka Rubavu mu murenge wa Nyamyumba,n’ikimenyabose iyo ugeze kuri Brasselie n’umwana muto yakurangira kwa West haba kuri El Classico yambere ndetse niya kabiri hamaze kuba ubukombe mu gutanga Serivisi nziza zaba iz’akabari,resitora n’ibindi bijyanye n’imyidagaduro.

West mu kiganiro na IBYAMAMARE yatuviriye imuzi n’imuzingo uko yinjiye mu mwuga wo gucuruza utubari,aho yatangiriye,aho bimugejeje n’uko abihuza no gufasha Abahanzi batandukanye.

Ibyamamare: West ni muntu ki ?

West: Nd’umunyarwanda amazina yanjye nyakuri ni Onesphore Nshimiyimana,ntuye muri Nyamyumba kuri Brasselie niho nkorera ibikorwa byanjye by’ubucuruzi by’utubari.

Ibyamamare: Winjiye mu bucuruzi bw’utubari gute ?

West: N’ibintu mazemo imyaka isaga icyenda (9) natangiye ubucuruzi bw’akabari muri 2010 natangiriye ku kabari gaciriritse nyuma y’imyaka myinshi nari maze nkora imilimo itandukanye nshakisha amafaranga hasi hejuru hano muri Rubavu. ndi mu bantu babize ibyuya kugira ngo ndebe ko natera imbere.

Nyuma yo kubona igishoro naje gukora umwuga wo gucuruza akabari niha intego yo kwiyima maze nkareba ko haraho nagera, yari inzira igoranye mu ntangiriro gusa uko iminsi yagiye itambuka byagiye biza kugera naho akabari nari mfite ka El Classico ya mbere kaje mu tubari twacuruzaga cyane ibintu nafashijwemo n’abahanzi bo mu karere ka Rubavu ku buryo bukomeye kuko bari mu bankururiye abakiliya binyuze mu bitaramo twagiye tuhakorera.

Ibyamamare: Ibijyanye no gufasha Abahanzi byo byaje gute ?

West: Ubundi bwo kuva mu buto bwanjye nakundaga umuziki,nd’umuntu nakuze numva nzaba umuhanzi gusa nyuma byaje kunyangira mbona atari impano yanjye ahubwo niyemeza ko ningira ubushobozi nzajya mfasha abahanzi cyane cyane ab’iwacu i Rubavu.

Ibyamamare: Kucyi wumvaga uzafasha abahanzi b’iwanyu i Rubavu ?

West: Mu by’ukuri s’ukorobanura Abahanzi , njye nakuze numva umuhanzi w’iwacu nawe yagira agaciro akagera kure,njye byarambabazaga kubona abahanzi bacu badaseruka hirya no hino mu Gihugu nkibaza umusanzu natanga ngo nabo bagaragare,Abahanzi bacu n’abahanga cyane benshi bazitirwa n’ubushobozi.

Ibyamamare: Aho ushingiye El Classico Beach n’iki cyakuje mu mutwe bwa mbere kugira ngo wigarurire abakiliya ?

West: Nk’umukunzi w’umuziki mbere na mbere nabanje gutecyereza ku kuntu Beach nayibyaza umusaruro,narabanje ngura ibyuma bya muzika n’amatara aryoshya iwanjye maze nshaka n’udushya twakurura abantu kugira ngo nerekane itandukaniro.

Nashyize imbaraga ku cyokezo cyanjye cy’amafi mbwira n’abakozi ko tugomba gukora nk’ikipe tukacyira neza abatugana maze tukarushaho gutera imbere twese.

Birumvikana nahise ntekereza ku bahanzi,ntangira ndeba uburyo twakorana bagakorera ibitaramo iwanjye,byagiye biba n’ubu birakomeje ndetse iwanjye mfite ababyinnyi bahoraho buri weekend basusurutsa abakiliya. nahaye imbaraga imyidagaduro n’abayikoramo bose baba Abahanzi,abakinnyi ba filime,abanyamakuru kugira ngo iwanjye hamamare.

Ibyamamare: Guhuza gucuruza akabari no gukorana bya hafi n’abahanzi hari icyo byunguye ku bucuruzi bwawe ?

West: Birumvikana byamafashije mbere na mbere kumenya ibigezweho no gusobanukirwa ibyo abatugana bashaka, izina ryanjye ryarazamutse ku buryo bugaragara kandi n’abatugana bariyongereye. ndakubwiza ukuri ko gukorana n’abahanzi ari inzira ikomeye cyane.

Ibyamamare: Hari abumva ko gukorana n’abahanzi bisaba kwifashisha abamaze kubaka izina mu Gihugu ?

West: Mbere na mbere ndagira ngo nshimire Abahanzi b’iwacu i Rubavu bamaze kumenya icyo bashaka n’abahanga kandi bafite abantu babakunda njyewe nabihamya. bo bitinyuke bumve ko ibyo bakora babizi.

Gukorana n’abahanzi bakomeye mu gihugu turakorana ariko sinakwima umwanya abahanzi bacu. ntitutabafasha bazafashwa nande ? twebwe ubwacu dukunde iby’iwacu. ndakubwiza ukuri ko umuntu wese wakorana n’abana b’iwacu ntibyamubuza kubona abakiliya. twe tubafashe nabo bagere ku rwego rw’Igihugu.

Ibyamamare: Ni nk’ibiki West afasha abahanzi Nyarwanda by’umwihariko abo mu karere ka Rubavu

West: Ni byinshi cyane pee! buriya umuhanzi iyo yakoze indirimbo nziza biba bisaba ko ayereka abakunzi be binyuze mu bitaramo, njye iwanjye muri El Classico Beach nateguye ahantu heza ngura n’ibyuma bigezweho,umuhanzi ahakorera igitaramo akunguka nanjye nkunguka, hari abahanzi benshi mfasha mu gukora indirimbo yaba iz’amajwi cyangwa amashusho ni byinshi njyamfashanya n’abahanzi b’iwacu.

Ibyamamare: ni uwuhe mwihariko uba muri El Classico Beach kwa West ?

West: Umwihariko wa mbere n’ukwakira abatugana neza, mbere na mbere iwacu twubaha amafaranga y’umukiliya. birazwi ko muri El Classico Beach ariho wokerezwa ifi irobwe ako kanya mu Kivu ukayocyerezwa n’abahanga ndetse ukanatemberezwa mu Kivu n’ibindi byinshi biherecyezwa n’umuziki uyunguruye utangwa naba Djs babigize umwuga.

Ibyamamare: usibye Abahanzi n’abategura ibitaramo. haba hari abandi ubucuruzi bwawe bugirira akamaro mu buzima bwa buri munsi ?

West: Barahari cyane nk’ubu urebye hano abantu bahakora ubwabo wabona akamaro hafitiye umuryango Nyarwanda. hano dufite abakozi benshi barimo abize amashuli naza Kaminuza,hari Ababyeyi bacuruza amafi hano twasanze tutakwikubira,dutangira umusoro ku gihe urumva El Classico Zombi hari umusanzu zitanga kw’iterambere ry’Igihugu.

Urubyiruko rumwita Fire West

Ibyamamare: Gira ubutumwa uhereza abacuruzi batandukanye bataraha agaciro abanyempano cyane cyane abahanzi bumva ko ari nkaba Sagihobe ?

West: “Abahanzi si ba Sagihobe.”

Oya rwose ibintu byarahindutse. ijwi ry’umuhanzi rigera kure ku buryo utabasha kumva,buriya abahanzi n’abantu bakomeye kubashoramo amafaranga ntiwapfa guhomba. twumve ko kariya ari akazi kabo kandi kabatunze ikindi tugomba kubashyigikira.

Ibyamamare:Dusoza gira ubutumwa ugenera Abanyarwanda ndetse n’abasohokera muri El Classico

West: Mbere na mbere ndashimira Leta y’Urwanda kuko idufasha byinshi by’umwihariko Nyakubahwa Perezida Paul Kagame udukangurira gukora tukiteza imbere. dukure amaboko mu mifuka dukore kandi mu Rwanda dufite amahirwe menshi tuyabyaze umusaruro.

Abasohokera muri El Classico mbifurije mbere na mbere Noheli Nziza n’umwaka mushya muhire mbabwira ko mu minsi mikuru twabashyiriyeho promotion ku bintu bitandukanye kandi tuzishimana n’Abahanzi benshi kandi bakunzwe.

Ibyamamare: Murakoze

West: namwe murakoze cyane ku mwanya wanyu ndetse n’itafari rikomeye muri kubaka mu gushyigikira abanyempano mu Rwanda by’umwihariko mu ntara Imana ibahe umugisha n’itangazamakuru muri rusange.

WEST nyiri El Classico kuri Brasselie i Rubavu

 

Aha West yari yakiriye Abahanzi n’abandi begukanye ibihembo muri Kivu Awards2019

 

 

Tanga Igitekerezo ukoresheje Facebook

SHARE