Rubavu : Menya uko Abana bahoze ku muhanda bahinduriwe ubuzima na Ubumwe Community Center

Ubumwe Community Center(UCC) ni ikigo gitangirwamo uburezi budaheza cyakira abafite ubumuga n’abatabufite (Inclusive Education), mu mashuri y’incuke n’abanza giherereye mu Karere ka Rubavu mu murenge wa Gisenyi mu Kagali ka Mbugangali.Kigisha n’ubumenyi ngiro burimo kudoda, kuboha, Muzika n’ibindi.

Abana biga muri iki kigo biga indimi zitandukanye bikaba akarusho kuko bigishwa n’ururimi rw’amarenga rubahuza mu biganiro na bagenzi babo bafite ubumuga bwo kutumva no kutavuga biga muri iki kigo no hanze yacyo.

Hashize imyaka 3 iki kigo cyakiriye Abana 23 babaga ku muhanda(Mayibobo) mu mujyi wa Gisenyi kibafasha gusubira mw’ishuli bava mu buzima bubi bwo ku muhanda aho Umuyobozi wa UCC Bwana Zacharie Dusingizimana yabemereye kubafasha kwiga no kubafasha kubaho kugira ngo bahindure ubuzima.

Muri ibi bihe Abanyarwanda bose basabwa kuguma mu rugo kubera icyorezo cya Covid-19 IBYAMAMARE.COM twegereye Zacharie Dusingizimana umuyobozi wa UCC atubwira uko babayeho by’umwihariko atuganiriza ku buzima bwabo bana bahoze mu muhanda.

Zacharie Dusingizimana umuyobozi wa Ubumwe Community Center

Ibyamamare.com: Abana bahoze mu muhanda baba muri UCC ubu babayeho bate ?

Zacharie : Mu bihe bisanzwe aba bana Baza kwiga nk’abandi kuri UCC, bakahafatira amafunguro yose mu gitondo, saa sita na ni mugoroba mbere yo gutaha mu miryango cyangwa mu ngo babamo bonyine.

Muri ibi bihe bya Covid-19 byo kuguma mu rugo byabaye ngombwa ko Baza kuba mu kigo kubera ko byari bigoranye ko baguma aho bita mu rugo, abenshi bari kwibona mu muhanda kubera ko ntabyo kurya bari kubona. Bose hamwe ni 19, ariko ubu abari kuba mukigo ni 12.

Ibyamamare.com: Ni abana bangahe bavuye mu muhanda bafashwa kwiga na UCC ?

Zacharie: Baje ari abana 23 ubu hasigaye abana 19 hari 4 kwiga byananiye basubira mu buzima bwo ku muhanda.

Ibyamamare.com: Aba bana bageze muri UCC gute ?

Zacharie : Hashize imyaka 3 bageze mu kigo nyuma y’igihe kirekire bibera mumuhanda, baje binyujijwe ku basore babiri Anaclet Nsabimana na Johnson Ndekezi muri WOW Rwanda Holidays aho bakundaga kubitaho bakiri ku muhanda , umunsi umwe bantumiye mu birori by’umuziki wari ugamije kugurira inkweto abo bana nditabira mbonye uburyo babyina numva biranyuze.

Ibyamamare.com: Ibirori birangiye hakurikiyeho iki ?

Zacharie : Ibirori birangiye nababajije icyo umuntu yabafasha abenshi bavuga ko bashaka kwiga , mpita mbwabwira ko kuwa mbere bazaza tukabafasha kwiga tukanabitaho mubyo bazakenera mukwiga.

Ibyamamare.com: Ubibemerera nk’abana bo ku muhanda wumvaga bazaza kwiga koko ?

Zacharie : Mbibemerera sinari nizeye ko bazaza kubera ko hari benshi bagiye babimbwira ariko ntibabikore.natunguwe no kubabona bose baje kandi ubona rwose babifitiye inyota. Twabashakiye iby’ibanze baratangira bariga kugeza ubu.

Ibyamamare.com : Bakigera mu kigo n’iki mwihutiye kubakorera ?

Zacharie: Twihutiye kubaganiriza kugirango tumenye abo ari bo. Imiryango yabo ndetse n’impamvu yatumye bajya ku muhanda. Ikindi twababwiye amategeko ikigo kigenderaho kandi ko utayubahirije yigendera agasubira mu muhanda, Ikindi basabwe gikomeye nuko condition bari bafite yo kuguma muri UCC ikabafasha yari ukwiga bakamenyerwa ibindi bisigaye. Kandi ko mumuhanda no kwiga bitabangikana ko habaho guhitamo kimwe.

Ibyamamare.com : N’iki cyabagoye kugira ngo bajye kuri rthyme y’abandi bana ?

Zacharie : Icyambere cyagoranye ni icyo kumva ko batagomba kuva kw’ishuli ngo bahitire mw’isoko. Ikindi cyagoranye n’uko abenshi bagiye mu mashuri bibonye bari kwigana n’utwana baruta cyane mu myaka, Imyifatire, imivugire imbere y’abarimu nayo yabanje kugorana ariko kubera ko dufite abarimu bize iby’uburezi budaheza bagiye babayobora buhoro buhoro.

Ibyamamare.com : Usibye kubashyira mw’ishuli bakiga n’ibiki bindi mubafasha kugira ngo bazatungwe n’impano zabo ?

Zacharie : Usibye kwiga mu mashuri hamwe n ‘abandi bana, twakomeje gukurikirana ya Mpano yabo yo kubyina bivuze ko amarushanwa tumenye yose ajyanye nabyo tubafasha kuyitabira, Ikindi kandi muri weekend n’ubundi bo baba bagomba kwirirwa mu kigo niwo mwanya baba bagomba gukora practices zabo. Si ibyo gusa kuko bose ntibabyina ahubwo hari n’abagaragaje ibindi harimo gukoresha ururimi rw’amarenga, gucuranga ndetse n’imyuga ( hari uwarangije ubu mu kudoda ubu afite imashini adoda imyenda, yatangiye kwinjiza)

Ibyamamare.com : Imibanire yabo n’abandi bana ihagaze ite ? Ese mw’ishuli baratsinda neza ?

Zacharie : Mu mizo ya mbere byabanje kugorana bakironda ariko ubu nyuma yo kuganirizwa kenshi bameze neza abenshi nibo usanga ari ba chéf de classe nibo bashyira abandi ku murongo.
Baratsinda neza hafi ya bose kuko ntawe urasibira mu mwaka umwe.

Ibyamamare.com: Duhe ishusho y’uko umunsi wabo uba uteye muri ibi bihe bya Guma mu rugo.

Zacharie : Nk’uko bigenda mu rugo urwo arirwo rwose hari umukozi wa UCC ubana nabo nk’umubyeyi. nk’uko n’abandi ntawe usohoka mu rugo nabo ntawemerewe gusohoka mu kigo. Hari ingengabihe ya buri munsi igaragaza imirimo baba bagomba gukora harimo amasuku, gufasha mu gikoni, gukora imikoro yo kw’ishuli, kuruhuka bareba amakuru na filime n’ibindi.

Ibyamamare.com : Ni ubuhe butumwa mwagira abumva ko abana bo mu muhanda batahinduka kandi ntacyo bamaze ?

Zacharie : Ubutumwa n’uko nta muntu utahinduka iyo ahawe agaciro ke ndetse n’urukundo hakiyongeraho no kumutega amatwi mukajya inama.Umwereka ingaruka zo kwitwara nabi cyangwa izo kwitwara neza.

Ibyamamare.com : Nka UCC musangize Abanyarwanda uko bafata abana muri ibi bihe bya Guma mu rugo kugira ngo birinde kwandura no gukwirakwiza Coronavirus.

Zacharie : Icya mbere ni ukuguma murugo ntihagire ahandi hantu bajya. Ikindi bagakaraba intoki inshuro nyinshi ndetse n’andi mabwiriza yose ajyanye no kwirinda.
Ikindi gikomeye kandi gifasha abana ni ukubakorera gahunda zihoraho za buri munsi ku buryo bahora bahuze Bafite amatsinda bakoreramo kandi bakagenda bayasimburanwamo, Imikoro yo kwishuri nayo ikaba ihagije.

Ibyamamare.com: Turabashimiye

Zacharie : Namwe turabashimiye murakoze cyane.

Aba bana mbere yo kujya muri Ubumwe Community Center(UCC) bafashwaga na Wow Rwanda Holidays muri Gahunda ya Yaseka Projects aho bigishwaga kubyina, Gushushanya n’utundi dukino twatumaga batirirwa mu muhanda mu mujyi wa Gisenyi gusa icyo gihe ubuzima bwabo ntibwari buhagaze neza kubera amikoro macye ari nayo mpamvu hateguwe icyo gitaramo Zacharie Dusingizimana yaboneyemo abo bana akemera kubafasha kugeza basoje amashuli yabo.

Anaclet Nsabimana watangije iki gikorwa cyo gukura aba bana mu muhanda binyuze muri Yaseka Projet
Aba bana basigaye biga neza ubuzima bwo ku muhanda barabusezereye
Mw’ishuli baratsinda neza ubuzima bwabo bwarahindutse
Birirwa mu kigo mu rwego rwo kwirinda Covid-19

 

Tanga Igitekerezo ukoresheje Facebook

SHARE