Rubavu: Nyinawimfura Rose utuye USA yafashije imiryango 21 yagizweho ingaruka na Coronavirus

Kuri  iki Cyumweru taliki ya 12 Mata 2020 isaa 09h00 zuzzuye mu karere ka Rubavu ,Umurenge wa Gisenyi mu Kagali ka Mbugangali Nyinawimfura Rose utuye i Texas muri Leta Zunze Ubumwe z’Amerika yatanze ibiribwa byo gufasha abahuye n’ingaruka z’icyorezo cya Coronavirus . ni muri Gahunda yo kunganira Ubuyobozi bw’Urwanda mu gufasha Abanyarwanda batorohewe n’ingaruka z’iki cyorezo cyugarije isi.

Iki gikorwa cyabereye mu kigo cy’amashuli yisumbuye cya UMUBANO I mu mujyi wa Gisenyi mu karere ka Rubavu mu ntara y’Uburengerazuba bw’Urwanda bamwe mu batabasha kubona ibifungurwa bahawe ibiribwa byo kubafasha gusunika iminsi muri ibi bihe bya Guma Murugo. iki gikorwa  cyari kiyobowe n’umuryango wa Nyinawimfura Rose utuye i Gisenyi wari uhagarariwe na Bwana Ngandura Munyanziza Jean Bosco ndetse na Bwana Faustin Uwimana  umunyamabanga Nshingwabikorwa w’Akagali ka Mbungangali.

Bimwe mu biribwa byatanzwe

Muri aka Kagali ka Mbugangali imiryango 21 yahawe ibiribwa bingana na Kologarama 525 by’ifu ya Kawunga , ibiro 420 by’ibishyimbo ,Litilo 42 z’amavuta yo guteka ndetse n’isabune 21 aho buri muryango wagenewe ibiro 25 bya Kawunga,ibiro 20 by’ibishyimbo,Litilo 2 z’amavuta n’umuti w’isabune.

Abaturage bahawe iyi nkunga y’ingoboka bose bashimiye uyu mubyeyi (Rose) bamwifuriza kubona ijuru bitewe n’ineza yo gufasha abababaye muri ibi  bihe  bikomeye aho icyo kurya kibona umugabo kigasiba undi.

Mu kiganiro n’Umunyamakuru wa IBYAMAMARE i Rubavu  mw’ijwi ryuzuye umunezero bashimiye uyu mubyeyi wabibutse mu bihe bikomeye

ibi nibyo biribwa byahabwaga  umuryango umwe

Murekeyiteto Beatrice utuye mu kagali ka Mbugangali wahawe iyi nkunga y’ingoboka usanzwe ufite umugabo ucuruza amatungo magufi ariko muri ibi bihe umugabo utakibasha gukora aka kazi bitewe n’ibihe turimo yagize ati :

“Turishimye cyane kuba badutekerejeho kubera ko nti byoroshye ariko nta kundi byagenda tugomba gukurikiza amabwiriza kuko tuzi agaciro k’ubuzima turishimye cyane ntabirenze gushima no kwishima twarenzaho.Imana ihe umugisha uwadutekerejeho”

Murekeyiteto Beatrice umwe mu bahawe inkunga y’ingoboka

Uyu mubyeyi avuga ko nyuma y’uko akazi gahagaze ko gucuruza amatungo magufi basigaye barwana n’ubuzima ndetse no gushaka ibyarengera umuryango wabo muri ibi bihe bitoroshye ariko uko iminsi ishira bizera ko ibintu bizasubira mu buryo bakabasha kongera kubaho neza banibutsa Abanyarwanda kuzirikana ingamba zashyizweho na Leta y’Urwanda mu guhangana na Covid-19

“Akazi karahagaze, nta kintu twongeye gukora turi umuryango w’abantu 7 twizera ko ibi bihe bikomeye turimo bizashira,Abanyarwanda twirinde ibyadutera ubwandu kandi dukurikize inama tugirwa n’buyobozi tuzirikane ingamba zo guhangana n’iki cyorezo tugirwa n’ubuyobozi bw’Igihugu”

Kubwa Mukeshimana Odette Umupfakazi ufite abana bane utuye mu Mudugudu wa Nyarubande mu Kagali ka Mbugangali avuga ko yishimiye iyi nkunga y’ingoboka agasaba abantu kwizera Imana kuko igoboka mu bihe bikomeye

“Twishimiye iyi nkunga y’ingoboka ntago byari byoroshye,Uyu mubyeyi wadufashije Imana imuhe umugisha. Mbere ya byose n’ugusenga kuko iyo usenze Imana igenda inyuza mu maboko y’abantu.icyambere n’ugusenge maze tukubahiriza amabwiriza y’ubuyobozi. uyu mubyeyi watwibutse Imana izibuke imilimo myiza yakoze imuhe igihembo gikwiriye abizera”

Kanamugire Janvier utuye i Rurembo muri Byahi nawe wahawe inkunga y’ingoboka yashimiye uyu mubyeyi anavuga ko iyi minsi itari imworoheye nk’umuntu wari utunzwe n’akazi k’ubuyede mu mujyi wa Goma.

“Ndashimira uyu mubyeyi wadufashije muri ibi bihe twugarijwe na Coronavirus,twubahirije guma murugo nkanjye nari umuyedi i Goma ibiryo byari byarashize gusa uyu mubyeyi aradufashije Imana imuhe umugisha”

Abahawe ibiribwa batoranyijwe mu Isibo by’umwihariko hakurikijwe abagizweho ingaruka zikomeye na Coronavirus

Ngandura Munyanziza Jean Bosco avuga ko uyu mubyeyi witwa Nyinawimfura Rose utuye USA muri Leta ya Texas yagize igitecyerezo cyo gufasha Bene wabo muri ibi bihe isi yugarijwe n’icyorezo cya Coronavirus aho ibihugu byose byategetse abaturage kuguma mu rugo nk’ingamba ikomeye yo guhangana n’iki cyorezo

” Nk’umuntu usenga ndetse ukunda Imana yifuje kuba hafi y’Abanyarwanda niyo mpamvu yafashe umwanzuro aravuga ngo  muri bicye mfite nsanzwe mfite mu muryango reka mbigabe kabiri mbisangire na bene wacu batorohewe n’ubuzima muri ibi bihe kugira ngo turebe ko icyi cyorezo cyarangira “

Munyanziza akomeza agira ati: ” Nyinawimfura Rose muri ibi bihe bikomeye yageneye ubutumwa bukomeye abantu basenga kugira umutima w’ubutwali kugira ngo babe hafi abantu bose kandi basangire n’abatishoboye kuko nirwo rukundo Imana idukeneyeho muri iki gihe”

Jean Bosco Munyanziza wari uhagarariye umuryango wa Nyinamfura utuye i Texas muri USA

Mu butumwa bwihariye bwa Munyanziza wari uhagarariye uyu mubyeyi utuye muri USA yasabye abantu gufashanya muri ibi bihe bikomeye anibutsa abifite kuzirikana no kugoboka abakomerewe n’ibi bihe anasaba abantu kubaha amabwiriza ya Leta ku kurwanya ubwandu n’ikwirakwira by’iki cyorezo.

Faustin Uwimana umunyamabanga Nshinwabikorwa w’akagali ka Mbugangali yashimiye uyu mubyeyi wakoze igikorwa cy’ubutwali cyo kugoboka abageramiwe n’ibi bihe anatangaza ko ibikorwa nk’ibi bikorwa mu mucyo kandi hashingirwa ku bababaye kurusha abandi bihereye mw’Isibo aho asaba abaturage bo mu kagali ayobora ndetse n’Abanyarwanda muri rusange kubaha amabwiriza yashyizweho na Leta y’Urwanda mu guhangana na Coronavirus.

Uwimana Faustin Umunyamabanga Nshingwabikorwa w’ akagali ka Mbugangali wari uhagarariye iki gikorwa

Tanga Igitekerezo ukoresheje Facebook

SHARE