Rubavu:Hamazwe impungenge ku basore basimburanya abana b’abakobwa muri Gahunda ya Guma murugo

Umuyobozi wungirije w’Akarere ka Rubavu ushinzwe iterambere ry’ubukungu, Nzabonimpa Deogratias yihanangirije bamwe mu basore bari kwitwikira ibi bihe byo kuguma murugo bakihererana abana b’abakobwa bakabamara iminsi babasambanya.

Ibi uyu muyobozi yabitangaje nyuma y’ibitecyerezo by’abaturage batandukanye bo mu karere ka Rubavu batanze kuri Radiyo Rubavu mu kiganiro Umuvugizi wa Polisi mu ntara y’Uburengerazuba na Visi Mayor Nzabonimpa Deogratias bagezaga ku baturage ku bijyanye no kwirinda Coronavirus no kurebera hamwe aho amabwiriza ya Minisitiri w’Intebe ageze yubahirizwa.

Mu bitecyerezo byatanzwe muri icyo kiganiro cyari kiyobowe na Saada Hakizimana kuri uyu wa 02 Mata 2020 byibanze ku buzima bukakaye burimo kubura ibiribwa hamwe na hamwe,urujya n’uruza rukomeje kugaragara aho benshi batubahiriza gahunda yashyizweho na Leta,ndetse na bumwe mu bujura buciye icyuho bukorwa n’abitwikira ibi bihe.

Bamwe mu baturage kandi bagaragaje impungenge zikomeye z’abasore basimburanya abana b’abakobwa mu mazu(Ghetto) aho bitera impungenge zikomeye zizavamo n’inda zitateguwe nyuma y’icyi cyorezo cya Coronavirus.

Visi Mayor yamaze impungenge aba baturage abasaba gutanga amakuru ahantu hose haboneka abasore bitwaza ibi bihe bakararura abana b’abakobwa avuga ko uzafatwa azakurikiranwa n’amategeko

“Abaturage nimwe mubana n’abantu nkabo,turabasaba kuduha amakuru ku gihe maze abantu nk’abo bagafatwa kuko ibi bihe byo kuguma mu rugo s’ukwishora mu ngeso mbi,ni umwanya wo kuguma mu rugo.abo bakobwa bagera aho banyuze he ?”

Deogratias Nzabonimpa yagarutse ku ruhare rw’ababyeyi muri ibi bihe ko bagomba gukurikirana uburere bw’abana babo ko ibi atari ibihe abana bakwiriye kwigiramo ibyomanzi

“Ibi si ibihe abana bakwiriye kwigira ibyomanzi,turasaba ababyeyi bose gukurikirana abana babo bakabaha uburere ntampavu yo kwishora mu ngeso mbi ababyeyi bakwiriye kumva impamvu yo kugumisha abana mu rugo”

Uyu muyobozi yavuze ko n’ubwo nta musore urafatanwa umukobwa mu nzu muri ibi bihe ariko batayobewe ko bihari hari abicyika mu kiza kuko bumva bivugwa hirya no hino ariho ahera aha gasopo abafite imyitwarire mibi nk’iyo ababwira ko urukuta rw’amategeko ruzabagonga

“Abantu nk’abo turabumva n’ubwo nta wurafatwa ariko nagira ngo mbabwire ko abazafatwa bazahura n’urukuta rw’amategeko “

Uyu muyobozi kandi yasabye abaturage kubahiriza gahunda zo kuguma mu rugo mu rwego rwo guhangana na Coronavirus naho abashonje ababwira ko hari gukorwa urutonde rw’abagiye guhabwa ingoboka

“Abantu bubahirize gahunda yo kuguma mu rugo bareke kugenda genda maze duhangane na Coronavirus kuko kuguma mu rugo nibwo burya bwo kuyihashya,abashonje nabo turi kubandika guhera mw’Isibo aho batuye kugira ngo tubashyikirize inkunga”

Uyu muyobozi kandi yihanangirije abayobozi bo mu nzego z’ibanze bazana amarangamutima ayo ariyo yose muri iyi gahunda yo gutanga ibiribwa ku batishoboye avuga ko uzagaragaraho amanyanga azahanwa nk’uwanyereje umutungo wa Leta

“Abayobozi b’inzego z’ibanze bumve neza uzafatwa yakoresheje amarangamutima n’ubundi buriganya mu guha abantu ibiribwa azakurikiranwa nkuwarigishije umutungo wa Leta.”

Nzabonimpa Deogratias Visi Mayor ushinzwe ubukungu mu karere ka Rubavu

Tanga Igitekerezo ukoresheje Facebook

SHARE