Rubavu:RIB yataye muri yombi Gitifu w’akagali watse indonke uwubakaga nta ruhushya

Urwego rw’Igihugu rw’Ubugenzacyaha RIB bwemeje amakuru y’uko bwataye muri yombi Sentwari David Umunyamabanga Nshingwabikorwa w’akagali ka Gikombe mu murenge wa Rubavu mu karere ka Rubavu ,akurikiranyweho gusaba no kwakira indonke y’umuturage wubakishaga cloture y’inzu abamo ntaruhushya.

Kuwa 23 Mata 2020 RIB ivuga ko yafashe uyu muyobozi nyuma yaho yaramaze kwakira amafaranga yatse umuturage witwa Mugwaneza Justine aho yamukangishaga ko natayamuha ari bumusenyere ibyo bikorwa by’ubwubatsi yari yaratangiye mu nzira zitemewe.

Ibi byamenyekanye ubwo umuturage witwa Mugwaneza Justine yahamagaye RIB ikorera I Rubavu ayimenyesha ko yatswe amafaranga angana n’ibihumbi 25000Frw yakirwa n’umuyobozi w’Umudugudu wa Rebero witwa Gasore Viateur nyamara nyuma yaho Gitifu w’akagali  yamusabye kongera kumwoherereza ibihumbi 15000Frw yabyanga akaza agasenya iyo cloture nta kuburana.

Mugwaneza Justine ngo akimara kwakwa ibyo bihumbi 15000Frw yoherereje Gitifu ibihumbi 5000Frw byo kuba amucubije nyamara Gitifu yamuhaye umunsi ntarengwa wo kuwa 23 Mata maze Justine  amwohererza ibihumbi 10.000Frw binyuze ku mu Agent witwa Ahishakiye Jeanne usanzwe unyuzwaho amafaranga uyu Munyamabanga Nshingwabikorwa w’akagali ka Gikombe yaka abaturage mu buryo butemewe.

RIB ikomeza ivuga ko yacungiye hafi ifata uyu mu Agent maze nawe avuga numero yoherejeho ayo mafaranga birangira David Sentwari afatanywe igihanga cy’ubutumwa bugufi bwakiriye ayo mafaranga.

RIB ivuga ko yafunguye dosiye kugira ngo akurikiranwe n’ubutabera inasaba abantu kwirinda gukora ibintu bitanyuze mu mucyo.

Tanga Igitekerezo ukoresheje Facebook

SHARE