Rugamba Claude n’Abatanihira biyongereye ku Igisupusupu mu bahanzi bafashwa na Alain Muku (Amafoto)

Umusore witwa Rugamba Claude wo mu karere ka Rusizi yegukanye irushanwa rya ‘Hanga Higa’ ritegurwa na Alain Muku akurikirwa n’itsinda ry’Abatanihira, bahita binjizwa muri label y’uyu mugabo yitwa Boss Papa isanzwe ibarizwamo Nsengiyumva Francois (Igisupusupu).

Kuri iki Cyumweru tariki ya 15 Ukuboza 2019 nibwo habaye igitaramo gisoza irushanwa rya ‘Hanga Higa’ rigamije gushakisha abana bafite impano muri mizika ariko babuze ubushobozi bwo kuzimurika kandi zishingiye ku mwimerere w’umuziki nyarwanda.

Iki gitaramo cyabereye i Nyamirambo mu ishuri rya Saint Andre, cyari cyitabiriwe n’abahatanaga bagera ku munani bageze mu cyiciro cyanyuma, abanyamakuru batandukanye n’abandi bafite aho bahurira n’ibikorwa bya muzika.

Abahatanaga buri wese yahawe umwanya yiyereka akanama nkemurampaka aririmba indirimbo imwe yihimbiye kandi acurangirwa na band.

Nyuma akanama nkemurampaka kari kagizwe na Gatsinda Jean Paul wamamaye mu gutunganya indirimbo nka Jay P, Nkurunziza Augustin uzwi mu muziki nka Producer Papito ndetse n’umunyamakuru Nyirarukundo Apophia baje kwemeza ko uwitwa Rugamba Claude ariwe wegukanye iri rushanwa.

Rugamba Claude yakurikiwe n’itsinda rigizwe n’abasore babiri ryitwa ‘Abatanihira’ ku mwanya wa kabiri akaba ari nabo bahise bahembwa kwinjizwa muri label ya Alain Muku yitwa Boss Papa.

Rugamba yabwiye itangazamakuru ko azirinda gutakaza icyizere n’amahirwe abonye kuva yinjijwe muri ‘Label’ ya ‘Boss Papa’. Ati “Ubu ubwo batugiriye icyizere bakatwakira tuzirinda ko bakidutakariza kandi ubu tugiye gutangira akazi”.

Mukuralinda Alain yashimye buri wese wahatanye muri iri rushanwa ndetse n’abafashije muri iki gikorwa. Avuga ko nta kindi gihembo muri iri rushanwa batanga uretse gufasha utsinze kumugira umuhanzi. Ngo guhera muri Mutarama 2019 aba bahanzi bose batangira gukorerwa indirimbo.

Rugamba Claude wabaye uwa mbere ubanza ibumoso n’abagize itsinda ry’Abatinihira bamuguye mu ntege.
Abari bagize akanama nkemurampaka kari kayobowe na Producer Jay P ubanza iburyo, umunyamakuru Apophia hagati na Producer Papito ibumoso.
Alain Muku ashimira aba batsinze n’abandi bose bitabiriye iri rushanwa ndetse n’abamufashije muri iki gikorwa.

 

Tanga Igitekerezo ukoresheje Facebook

SHARE