Search

Rulindo: Polisi y’u Rwanda yatwitse ibiyobyabwenge byafashwe,inakangurira abaturage kubyirinda

NAWE WATUNGA IMODOKA Y'INZOZI ZAWE, KANDA HANO WIGURIRE IMODOKA ZIHENDUTSE GUHERA KU MAFARANGA IBIHUMBI 100 GUSA

KANDA HANO UREBE VIDEO

Ku gicamunsi cyo ku wa kabiri tariki 6 z’uku kwezi, mu karere ka Rulindo habereye igikorwa cyo kwangiza urumogi n’inzoga zo mu masashi z’ubwoko butandukanye; abakitabiriye bakangurirwa kwirinda kwishora mu biyobyabwenge.

Ibyangijwe bigizwe n’udupfunyika (Bule) 9 000 tw’urumogi, litiro 46 za Kanyanga, amaduzeni 14 ya Blue Sky, amasashi 210 ya Chief Waragi, amasashi 192 ya Kick Waragi, n’amasashi 57 ya African Gin nk’uko urubuga rwa polisi rwabitangaje mu inkuru yarwo.

Igikorwa cyo kubyangiza cyabereye mu kagari ka Rwamahwa, mu murenge wa Base. Ibyangijwe byafashwe mu mezi atatu ashize.

Mu kiganiro yagiranye n’amagana y’abatuye agace cyabereyemo, Umuyobozi wa Polisi muri aka karere, Superintendent of Police (SP) Jean Bosco Rudasingwa yababwiye ko kunywa ibiyobyabwenge  bidatuma umuntu yibagirwa ibibazo asanganwe nk’uko bamwe bibwira; ahubwo ko aho kubimwibagizwa bimutera ibindi bibazo.

Yarababwiye ati,”Amafaranga ashorwa mu biyobyabwenge aba apfuye ubusa. Abari aha muri abahamya ko nta cyiza cyo kubyishoramo. Ababyinjiza mu gihugu, ababitunda babijyana ahantu hatandukanye, ababicuruza n’ababikoresha mu buryo bumwe cyangwa ubundi baragirwa inama yo kubireka.”

SP Rudasingwa yongeyeho ati, “Usibye kuba ibiyobyabwenge bitera ababinywa gukora ibyaha; binabatera uburwayi butandukanye butuma badakora ngo biteze imbere. Muri make kubyishoramo ni ukwikururira ubukene n’ibyago by’uburwayi.”

Yabwiye abari aho ko umuntu uhamwe no gukora, guhindura, kwinjiza no kugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000) nk’uko biteganywa n’ingingo ya 594 y’Igitabo cy’amategeko ahana ibyaha mu Rwanda.

Yabwiye urubyiruko rwitabiriye icyo gikorwa ko kunywa ibiyobyabwenge bishobora gutuma bishora mu ngeso mbi nk’ubusambanyi bukurikirwa n’ingaruka zirimo kwandura zimwe mu ndwara zandurira mu mibonano mpuzabitsina, gutwara inda, kureka ishuri, no kuba ababyeyi imburagihe.

Umuyobozi wa Polisi muri aka karere yashimye abatanze amakuru yatumye ibyo biyobyabwenge bifatwa; aboneraho gusaba buri wese utuye akarere ka Rulindo kwirinda ibyaha no kugira uruhare mu kubirwanya atangira ku gihe amakuru atuma inzengo zibishinzwe zibikumira no gufata ababikoze.

Mu butumwa bwe, ushinzwe imibereho myiza y’abaturage mu karere ka Rulindo, Gasanganwa Marie Claire yasabye abagatuye kuba amaso n’amatwi by’umutekano; aha akaba yarabasobanuriye icyo bishatse kuvuga agira ati,” Twese turemeranya ko umutekano ari inkingi ya mwamba y’iterambere, amahoro n’ituze birambye; kandi ko Polisi n’izindi nzego z’umutekano zitabera hose icyarimwe. Ibyo biha rero buri wese umukoro wo kuba umufatanyabikorwa mu gukumira icyo ari cyo cyose cyawuhungabanya. Icyo buri wese asabwa ni ukwirinda ibyaha no gutangira ku gihe amakuru atuma inzego zibishinzwe zibikumira.”

Yabasabye kwitabira gahunda za Leta zigamije iterambere, amahoro, ituze  n’umutekano byabo n’Igihugu muri rusange.

Na none kandi kuri uwo munsi mu turere twa Nyaruguru na Gasabo habereye ibikorwa byo kwangiza inzoga zitujuje ubuziranenge zahafatiwe.

Litiro 565 za Muriture n’ibiro birindwi by’Umusemburo witwa Pack-Maya ukoreshwa mu kwenga iki kinyobwa kiri ku rutonde rw’Ibiyobyabwenge mu Rwanda zafatiwe mu mirenge ya Cyahinda, Kibeho na  Muganza (Nyaruguru) zihita zimenwa.

Mu kagari ka Masoro, Umurenge wa Ndera (Gasabo) hafatiwe litiro 236 z’Inzoga z’ubwoko butandukanye. Zikimara gufatwa zahise zimenwa.

Abitabiriye ibikorwa byo kumena inzoga zafatiwe muri Nyaruguru na Gasabo basabwe kwirinda kuzenga, kuzicuruza no kuzinywa.

Richard [email protected]

Comments

comments




Leave a Reply

Your email address will not be published. Required fields are marked *