RURA yazamuye igiciro cy’amashanyarazi

Kuri uyu wa Kabiri tariki ya 13 Mutarama 2020 nibwo urwego rw’Igihugu Ngenzuramikorere RURA rwatangaje ibiciro bishya by’amashanyarazi bigiye gutangira kwubahirizwa mu gihugu hose.

Umuyobozi Mukuru wa RURA, Lt Col Patrick Nyirishema, mu kiganiro n’abanyamakuru yavuze ko ibi biciro bishya by’umuriro w’amashanyarazi bizatangira gukurikizwa guhera ku itariki ya 21 Mutarama 2020, hagamijwe korohereza Leta n’abikorera bashinzwe ingufu z’amashanyarazi kudahomba, kubera ikiguzi bayatangaho.

Ibi biciro bishya bikubiye mu byiciro bitandukanye, icyiciro cyo hasi cyane ni icy’abakoresha kilowatt imwe ku isaha (kWh) hagati ya 0-15. Kuri aba, igiciro gisanzwe kuri 89 Frw kuri KWh ndetse nta cyahindutse.

Ikindi cyiciro ni abakoresha kWh hagati ya 15-50, igiciro cyazamutseho 16% kiva ku 182 Frw kuri kWh kigera kuri 212 Frw, naho abakoresha hagati ya kWh zitarenze 50 cyazamutseho 19%, kiva kuri 210 Frw kuri kWh kigera kuri 249 Frw.

Ku nyubako z’ubucuruzi, abakoresha kWh zitarenze 100, igiciro cyavuye kuri 204 Frw kuri kWh kigera kuri 227 Frw, naho abakoresha kWh zirenze ijana igiciro cyavuye kuri 222 Frw kuri kWh kigera kuri 255 Frw.

Ibiciro ku ruganda ruto byavuye ku 110 Frw kuri kWh bigera kuri 134 Frw; uruganda ruciriritse rwavuye kuri 87 Frw kuri kWh rugera ku 103 Frw; uruganda runini rwavuye kuri 80 Frw kuri kWh rugera kuri 94 Frw.

Umuyobozi Mukuru wa REG, Ron Weiss, yavuze ko mu mpamvu zatumye ibiciro by’amashanyarazi bihinduka harimo ibikorwa by’amashanyarazi by’abikorera bagurisha umuriro leta, ugasanga bagiranye na Leta amasezerano mu madolari, ku buryo uko agaciro k’idolari kazamutse ari nako ibiciro mu gihugu bizamuka.

Ikindi ni uburyo mazutu ikoreshwa mu gutanga umuriro w’amashanyarazi igenda izamura igiciro, ndetse n’ikiguzi gisabwa mu gukwirakwiza amashanyarazi no gusana imiyoboro y’amashanyarazi.

Imbonerahamwe igaragaza ibiciro bishya by’amashanyarazi.

 

 

Tanga Igitekerezo ukoresheje Facebook

SHARE