Rusizi: Abafana b’ikipe ya Chelsea bafashije abagizweho ingaruka na Coronavirus

Abafana b’ikipe ya Chelsea yo mu Bwongereza bibumbiye muri Kamembe Official Supporters Club mu karere ka Rusizi bakoze igikorwa cyo gufasha abatishoboye babaha ibiribwa muri ibi bihe Urwanda n’isi byugarijwe n’icyorezo cya Coronavirus.

N’igikorwa cyabaye ku bufatanye n’inzego z’ibanze mu murenge wa Gihundwe aho abafana b’ikipe ya Chelsea FC mu karere ka Rusizi bafashije abaturage bo mu murenge wa Gihundwe ,Akagali ka Burunga,umudugudu wa Cyamahembe. abatoranyijwe bababaye kurusha abandi bahawe amafunguro agizwe n’umuceri,akawunga,amavuta yo guteka n’isabune yo kwifashisha bakora isuku.

Abafana b’ikipe ya Chelsea yo mu Bwongereza bibumbiye muri Kamembe Official Supportes Fan

Hagenimana David uyobora Chelsea Kamembe official Supporters Club avuga ko bateguye iki gikorwa mu rwego rwo kwishakamo ibisubizo ndetse no gufatanya mu guhangana n’ingaruka zatewe na Coronavirus aho bamwe mu batishoboye kubona ifunguro bigoranye muri ibi bihe

”Ibisubizo kuri iki kibazo cyugarije isi kuri ubu twese twagakwiye kugishakira umuti by’umwihariko nk’abenegihugu ubwabo kuko no mu mahanga bari guhangana n’ibyabo. Uretse leta n’imiryango itegamiye kuri leta, abantu mu matsinda atandukanye bari kujya bishyira hamwe, ku bufatanye n’inzego z’ibanze bakagaburira abababaye kurusha abandi kandi ni byo bikenewe.Gufashanya rero ni umuco Nyarwanda ariko ku bafana ba Chelsea twibumbiye muri Fan Club ya Kamembe Official Supporters Club natwe twabigize ibyacu.”

David Hagenimana akomeza avuga bateguye ibikorwa bitandukanye byo gufasha abatishoboye ko nyuma yabo mu kagali ka Burunga bazakomeza no gufasha abatishoboye

 “Nyuma y’ibikorwa by’urukundo tumaze iminsi dukorera abatishoboye by’umwihariko abarwayi, kuri ubu twafashije abatishoboye mu mu Kagari ka Burunga mu murenge wa Gihundwe mu karere ka Rusizi. Kimwe n’ubundi bufasha buri gutangwa na leta hamwe n’imiryango yigenga,  natwe twatanze ibiryo birimo umuceri, kawunga, amavuta yo guteka hamwe n’isabune kandi ntabwo twahagaze mu gihe hari icyo dufite tuzafasha n’abandi”.

Bahaye abaturage ibiribwa muri ibi bihe bitoroheye bamwe

Muri iki gikorwa cyo gufasha hafashijwe imiryango itanu (5) igizwe n’abantu 25 aho buri muryango washyikirijwe ibiro bitanu by’umuceri, bitanu bya kawunga, litiro imwe y’amavuta yo guteka hamwe n’umuti umwe w’isabune. Ibyatanzwe byose hamwe biri mu byiciro bitandukanye birimo: Ibiryo, amafaranga, kawunga, umuceri n’isabune(124k kawunga, (620k umuceri), (620k ibishyimbo) n’imiti 267 y’isabune.

Niyomungeri Jean Bosco umunyamabanga nshingwabikorwa w’akagali ka Burunga  yashimiye aba bakunzi ba Chelsea bakoze igikorwa cy’urukundo bakoze asaba n’abandi bafite gahunda nk’iyo kubegera anabamara impungenge ko abafashwa batoranywa naba Mutwarasibo kandi bareba ubabaye kurusha abandi.

“Ndasaba  Abanyarwanda bose kugira umutima ufasha na cyane ko u Rwanda kimwe n’isi biri mu bihe bikomeye byo kwirinda ikwirakwira ry’icyorezo cya Covid-19,abafite ubufasha bose begera inzego z’ibanze maze ubufasha bwabo bukagezwa ku baturage biciye mu mucyo.ba Mutwarasibo naba Mudugudu nibo bahitamo abo gufashwa kuko bahorana nabo.”

David Hagenimana mu kiganiro na IBYAMAMARE yavuze ko n’ubwo turi muri Gahunda ya Guma murugo  muri iyi minsi ijana yo Kwibuka bateguye gahunda yo kuremera no guhumuriza umwe mu muryango wacitse kw’icumu rya Jenoside yakorewe Abatutsi muwi 1994. asaba abantu kuzirikana abababaye kandi bigakoranwa umutima w’urukundo hakanubahirizwa amabwiriza ya Leta yo guhangana na Coronavirus.

Basabye abakunzi b’umupira w’amaguru gufashanya muri ibi bihe duhanganye na Coronavirus

Tanga Igitekerezo ukoresheje Facebook

SHARE