Rutahizamu Sugira Ernest yafashije Rayon Sports kubona amanota atatu itsinda Etincelles

Rutahizamu Sugira Ernest yafashije Rayon Sports kubona amanota atatu itsinda Etincelles 2-1 ku gitego yatsinze mu minota ya nyuma.

Etincelles FC yari yakiriye Rayon Sports kuri Stade Umuganda i Rubavu saa 15:00’. Rayon Sports yashakaga gutsinda uyu mukino kugira ngo ikomeza kwegera APR FC ya mbere iyirusha amanota 7.

Etincelles FC yatangiye umukino isatira cyane ariko Rayon Sports igashaka kuyinyura muri humye ishaka igitego hakiri kare.

Rayon Sports yasubiye ku mwanya wa kabiri nyuma yo gutsindira Etincelles FC iwayo

Uku gusatira byaje guha Etincelles FC igitego cya mbere ku munota wa 15’ gitsinzwe na Itangishaka Ibrahim.

Nyuma y’iki gitego umutoza Cassa Mbungo Andre yakoze impinduka havamo Nizeyimana Mirafa hinjiramo Bizimana Yannick.

Uyu musore na we ntiyasoje igice cya mbere kuko yaje kuvunika ahita asimburwa na Mugisha Gilbert. Igice cya mbere cyarangiye nta zindi mpinduka zibaye.

Rayon Sports yatangiye igice cya kabiri isatira cyane, icurika ikibuga ndetse igenda ibona amahirwe ariko kuyabyaza umusaruro bibanza kwanga.

Ku munota wa 72’ Sekamana Maxime yabonyeye Rayon Sports igitego cyo kwishyura ku ishoti rikomeye yatereye inyuma y’urubuga rw’amahina ku mupira yari ahawe na Mugisha Gilbert.

Sugira Ernest wari wagoye ubwugarizi bwa Etincelles, yaboneye Rayon Sports igitego cya kabiri ku mupira yari ahawe na Sekamana Maxime. Umukino warangiye ari 2-1.

Mu mikino yabaye ku munsi w’ejo, Mukura VS yatsinze Heroes FC 1-0 cya Iradukunda Betrand ku munota wa 37. AS Kigali yatsinze AS Muhanga 1-0 cya Ishimwe Christian ku munota wa 70, ni mu gihe Gicumbi FC yatsindiye Espoir FC i Rusizi.

Imikino yabaye uyu munsi, APR FC 1-0 Police FC, Etincelles 1-2 Rayon Sports, Sunrise FC 1-2 Musanze FC, Bugesera FC 0-1 Marines.

Nyuma y’umunsi wa 21, APR FC iyoboye urutonde n’amanota 51, Rayon Sports 44, Police FC 43, Mukura VS 37 mu gihe Kiyovu Sports ifite 32.

Tanga Igitekerezo ukoresheje Facebook

SHARE