Safi Madiba yatandukanye na The Mane yamufashaga gukora umuziki

Umuhanzi Safi wakoreraga indirimbo ze muri The Mane ashobora kuba agiye gutakaza inyungu zose ku bihangano yakoze kuva yagera muri The Mane nyuma yo kuyivamo agakorana n’iyindi nzu ifasha abahanzi nk’uko byemejwe na Bad Rama nyiri The Mane.

Inkuru z’uko Safi Madiba yavuye muri The Mane zatangiye guhwihwiswa ku mbuga nkoranyambaga zitandukanye nyuma y’uko hasohotse indirimbo yitwa Ntimunyurwa ya Safi na Dj Marnaud yakorewe ahandi hatari muri The Mane.

Byatangiye ibi bidafatwa nk’ukuri, gusa Bad Rama yemeje ko Safi yavuye muri The Mane, kandi  avuga ko kuva muri The Mane kwa Safi Madiba bizatuma atakaza nyinshi mu ndirimbo yahakoreye.

Safi Madiba

Ramadan Mupenda uzwi nka Bad Rama yagize ati: “ Tuzana Safi ni nkaho twatangiriye ku busa, dushora amafaranga menshi mu mpano ye y’umuziki gusa birangiye ahisemo gutandukana natwe atanabitumenyesheje, kandi azi neza ko kurenga ku masezerano yasinywe bikurikirwa n’ibihano”

Safi yageze muri The Mane muri 2017 nyuma yo gutandukana n’itsinda rya Urban Boyz.

Muri The Mane uyu muhanzi yahakoreye indirimbo nyinshi zamenyekanye cyane yakoranye n’abandi bahanzi bakomeye barimo n’abo hanze y’u Rwanda nka Rayvanny, Harmonize ndetse n’izindi yakoranye na Marina, nk’uko byatangajwe na Bad Rama akaba ashobora kuzibura zose kubera kurenga ku masezerano.

Gusa ibyo kurenga ku masezerano Safi arabihakana akavuga ko yakoranye n’abahanzi benshi indirimbo bitanyuze muri The Mane ariko akaba atarigeze abuzwa cyangwa ngo yiyamwe n’ubuyobozi bwa The Mane.

Yagize ati: “ Nta tegeko nigeze ndengaho ngendeye kubyo numvikanye na The Mane, kandi niba ari ukubera indirimbo nakoranye na Marnaud, nakoranye indirimbo nyinshi  n’abahanzi batandukanye nka Riderman n’abandi kandi ntawigeze ambwira ko hari ikibazo.

Safi Madiba uzwi mu ndirimbo  zakunzwe cyane nyinshi muri zo yakoreye muri The Mane nka My Hero. Good Mornig,Kontwari,Igifungo,Kimwe Kimwe n’izindi yatandukanye na Urban Boyz muri 2017 ashaka kugira ngo arebe ko yakwagura ibikorwa bye akoreshe impano ye aribwo yahise yegera iyi nzu ya The Mane ngo ibimufashemo.

The Mane ubusanzwe irimo abandi bahanzi nka Marina,Queen Cha ndetse na Kevin undi muhanzi ukizamuka uyinjiyemo vuba.

Tanga Igitekerezo ukoresheje Facebook

SHARE