Shampiyona y’Umupira w’Amaguru mu Rwanda n’Igikombe cy’Amahoro ntibikirangiye hazongera kuba amarushanwa muri Nzeri uyu mwaka.

Shampiyona y’Umupira w’amaguru mu Rwanda muri uyu mwaka w’imikino wa 2019/20 ntikirangiye bitewe n’icyorezo cya Coronavirus ndetse amarushanwa azongera gusubukurwa muri Nzeri uyu mwaka.

Ibikorwa byose by’imikino byahagaritswe mu Rwanda kuva tariki ya 15 Werurwe 2020, umunsi umwe nyuma y’uko hatangajwe umurwayi wa mbere wanduye Coronavirus.

Ku mugoroba wo kuri uyu wa Kabiri nibwo habaye inama yahuje Minisitiri wa Siporo, Munyangaju Aurore Mimosa n’abayobozi b’amashyirahamwe atandukanye y’imikino n’ingaga za siporo, yakozwe hifashishijwe uburyo bw’amashusho (Video-conference).

Mu byagarutsweho harimo kurebera hamwe amarushanwa yari ahari imbere mu gihugu n’ingaruka yagizweho na Coronavirus.

Amakuru avuga ko Shampiyona y’Umupira w’Amaguru muri uyu mwaka w’imikino n’Igikombe cy’Amahoro bitakirangiye ahubwo hashobora kongera kuba amarushanwa muri Nzeri uyu mwaka.

Hari gutekerezwa uburyo abakinnyi bashobora kuzongera gusubukura imyitozo muri Kanama ndetse akaba ari nako byagenda no mu yindi mikino ikinwa mu Rwanda.

Ubwo Shampiyona y’Icyiciro cya Mbere mu Rwanda yasubikwagwa, APR FC yari gukina na Espoir FC, yari ku mwanya wa mbere n’amanota 57 mu mikino 23, Rayon Sports iri ku mwanya wa kabiri n’amanota 51 mu mikino 24.

Espoir FC yanganyaga amanota 17 na Heroes FC, zikurikiwe na Gicumbi FC ya nyuma n’amanota 16.

Mu Cyiciro cya Kabiri, aho amakipe agabanyije mu matsinda abiri, hari hasojwe imikino ibanza. Hagombaga gukurikiraho iyo kwishyura, yarangira hakabaho iyo gukuranamo ihuza amakipe ane ya mbere mu matsinda, igatanga abiri azamuka mu cyiciro cya mbere.

Igikombe cy’Amahoro gisanzwe gitanga ikipe ihagararira u Rwanda muri CAF Confederation Cup, cyari kigeze muri 1/8.

Shampiyona y’Icyiciro cya Mbere mu bagore igizwe n’amakipe 10, yaburaga umukino umwe ngo ibanza irangire mu gihe icyiciro cya kabiri mu bagore aribwo bari basoje imikino ibanza.

Kuri uyu wa Kabiri, FERWAFA yari yatangaje ko umwanzuro wa nyuma ku marushanwa itegura uzamenyekana bitarenze tariki ya 30 Gicurasi, aho muri iyi minsi hateganyijwe inama izayihuza n’abanyamuryango bayo ndetse n’abatanyabikorwa barimo Minisiteri ya Siporo.

Byitezwe ko iyo nama izigira hamwe ingingo eshatu zishoboka mu gusoza shampiyona, zirimo kuba hatangwa igikombe cya Shampiyona kuri APR FC ya mbere, hakarebwa niba kandi hari n’amakipe yamanuka mu cyiciro cya kabiri.

Hari uburyo bwo gusesa burundu shampiyona (ntihatangwe igikombe), APR FC igasohoka nk’ikipe ya mbere, Rayon Sports ikaba iya kabiri cyangwa se imikino yose ikagirwa impfabusa, aho Rayon Sports na AS Kigali zahagarariye u Rwanda muri uyu mwaka w’imikino, ari zo zakongera guhagarira igihugu mu mwaka w’imikino 2020/21.

Tanga Igitekerezo ukoresheje Facebook

SHARE