SKOL Adrien Cycling Academy (SACA) igiye gukina Tour du Rwanda bwambere yerekanye abakinnyi izifashisha (Amafoto)

Ku mugoroba wo kuri uyu wa Kane tariki 20 Gashyantare 2020 nibwo uruganda rwa SKOL Brewery Ltd n’ubuyobozi bwa SACA bamurikiye abanyamakuru abakinnyi bazabaserukira muri Tour du Rwanda 2020, banagaragaza intego bajyanye muri iri siganwa bagiye kwitabira ku nshuro ya mbere.

SACA yashinzwe na Adrien Niyonshuti yatangira yitwa ANCA (Adrien Niyonshuti Cycling Academy) nyuma iza kwihuza na SKOL Fly Cycling Team bibyara SACA (SKOL Adrien Cycling Academy), ubu ikaba iri mu cyiciro cya Continental Team igamije kuzamura impano z’abana b’Abanyarwanda mu kunyonga igare.

Abakinnyi batanu SACA izifashisha muri Tour du Rwanda 2020 barimo Habimana Jean Eric, Nsengiyumva Shemu, Mugisha Moise, Hakizimana Seth na Dukuzumuremyi Ally Fidèle.

Iyi kipe igizwe n’abakinnyi 11 bakiri bato kugeza ubu bamaze kwitabira irushanwa rimwe ryo kwibuka Intwari z’u Rwanda ryabaye muri Mutarama uyu mwaka.

Nubwo ari ubwambere bagiye kwitabira irushanwa mpuzamahanga nka Tour du Rwanda, bafite intego yo gutwara uduce tumwe na tumwe tw’iri siganwa nk’uko byatangajwe na Niyonshuti Adrie utoza iyi kipe.

Yagize ati “Igare ritadutengushye nka Mugisha Moise na Hakizimana Seth nizeye ko ubunararibonye bafite muri Tour du Rwanda bwatuma twegukana uduce nka dutatu muri Tour du Rwanda y’uyu mwaka.”

Anitha Haguma ushinzwe Ubucurizi muri SKOL yashimangiye ko SACA izaba inzira nziza zo gufasha abakinnyi b’Abanyarwanda gukina mu makipe akomeye muri uyu mukino.

Tour du Rwanda izaba ikinwa ku nshuro ya 12 kuva mu 2009 ubwo yagirwaga mpuzamahanga, izitabirwa n’amakipe 16 atandukanye harimo amakipe ane y’ibihugu ariyo; Team Rwanda, Algeria, Ethiopia na Erythrea.

Uretse Tour du Rwanda 2020, SACA iteganya kwitabira andi masiganwa arimo Tour de l’Egypte, Tour de Limpopo, Tour du Cameroun, Tour du Sénégal n’ayandi atandukanye.

SACA yabaye ikipe ya kabiri yo mu Rwanda iri ku rwego rwo gukina amasiganwa yo ku mugabane nyuma ya Benediction y’i Rubavu, yashyizwe muri iki cyiciro mu mwaka ushize.

Anitha Haguma ushinzwe Ubucurizi muri SKOL, Winfred Kabega perezidante wa SACA Team na Adrien Niyonshuti ubwo bari mu kiganiro n’abanyamakuru.
Abakinnyi 5 bazaserukira SACA muri Tour du Rwanda 2020.
Abakinnyi ba SACA na staff yabo izaba ibafasha muri Tour du Rwanda.
Bafashe ifoto y’urwibutso n’abayobozi batandukanye ba Skol Rwanda.

 

Tanga Igitekerezo ukoresheje Facebook

SHARE