Social Mula yabuze Prix Découvertes 2019, itwarwa na Céline Banza wo muri RD Congo

Umuhanzi Social Mula wari uhagarariye u Rwanda mu cyiciro cyanyuma cy’irushanwa ry’umuziki Prix Découvertes 2019, ntiyahiriwe n’iri rushanwa kuko ryegukanwe n’umukobwa witwa Céline Banza ukomoka muri Repubulika Iharanira Demokarasi ya Congo.

Kuri uyu wa Kane tariki ya 7 Ugushyingo 2019 nibwo abakemurampaka mu irushanwa rya Prix Découvertes batangaje uwegukanye iri rushanwa uyu mwaka.

Icyiciro cyanyuma cy’iri rushanwa ritegurwa na radio mpuzamahanga y’Abafaransa RFI, cyahatanagamo abanyamuziki 10 baturutse mu bihugu bitandukanye bikoresha igifaransa ku mugabane wa Africa.

Akanama nkemurampaka kari kagizwe n’abahanzi b’amazina akomeye nka: A’Salfo, Charlotte Dipanda, Tiken Jah Fakoly, Fally Ipupa, Josey, Angélique Kidjo, Youssou N’Dour, Oumou Sangaré na Singuila baje kwemeza ko Céline Banza w’imyaka 22 y’amavuko ariwe ukwiriye iki gihembo.

RFI itegura iri rushanwa yavuze ko iki gihembo ahawe ari ugutera ingabo mu bitugu urugendo rw’umuziki rw’uyu mukobwa ukiri muto wo muri Congo.

Bavuze kandi ko bizamufasha gukomeza kwiyubaka no kunoza neza umwuga we w’umuziki mu nzira yatangiye

akawagura ukagera ku rwego mpuzamahanga. Uretse guhabwa igihembo anagenerwa amayero ibihumbi icumi [10,000 euros; ni ukuvuga asaga Miliyoni 10 Frw.

Social Mula utahiriwe n’iri rushanwa akomeje imyiteguro y’igitaramo gikomeye azamurikiramo album ye ya mbere yise ‘Ma Vie’, kizaba kuri 23 Ugushyingo 2019 muri Camp Kigali.

Céline Banza watsindiye Prix Découvertes 2019.
Abanyamuziki 10 bahatanga mu cyiciro cyanyuma.
Social Mula aritegura kumurika albumye ya mbere.

 

Tanga Igitekerezo ukoresheje Facebook

SHARE