Stade Amahoro igiye kuvugururwa ihabwe ubwiza nkubwa Stade z’iburayi

Umushinga wo kuvugurura Stade Amahoro wamaze kwigwa, ndetse mu gihe cya vuba imirimo yo kuyivugurura izaba yatangiye, biteganyijwe ko izajya yakira abantu ibihumbi 40.

Imirimo yo kuvugurura iyi stade iba yaratangiranye n’intangiriro z’uku kwezi ku Gushyingo, MINISPOC yari yatanze tariki ya 20 Ukwakira kuba abakoreramo bose bavuyemo kugira ngo itangire kuvugururwa, gusa bamwe basa nabagowe kubona aho bimukira ari nayo mpamvu imirimo yo kuyivugurura itaratangira.

Amakuru avuga ko abakoreramo barimo na Minisiteri ya Siporo ndetse n’iy’Umuco bategereje ko ikigo cy’igihugu gishinzwe imiturire (Rwanda Housing Authority) kizabereka aho kwimukira kuko Minisiteri ngo siyo yishakira aho izakorera.

Iyi stade yakiraga ibihumbi 23 birengaho, izajya yakira ibihumbi 40 nyuma yo kuvugururwa.

Nk’uko bigaragara ku gishashunyo cyayo, Stade Amahoro izasakarwa yose ndetse yongererwamo n’imyanya, yasaga n’iri hejuru cyane bazayimanura ku buryo imyanya izegera hasi hafi n’ikibuga.

Si Stade Amahoro gusa izavugururwa kuko na Petit Stade nayo izavugururwa, hazubakwa n’ibindi bibuga ku nkengero z’iyi stade ndetse n’ibindi bishobora gufasha abantu gukora siporo, nk’aho ahasanzwe higishirizwa imodoka hazaba hari ikibuga cy’umupira w’amaguru.

Inshingano zo kuvugurura iyi stade zikaba zarahawe kompanyi yo muri Turikiya ya Summa ari yo yanubatse Kigali Arena, biteganyijwe ko iyi Stade izatahwa mu mpenshyi ya 2020.

Tanga Igitekerezo ukoresheje Facebook

SHARE