Sugira Erneste yarekuwe na APR FC, atizwa mu ikipe ya Rayon Sports

Rutahizamu w’ikipe y’igihugu Amavubi, Sugira Erneste wari warafatiwe ibihano n’ikipe ya APR FC, yatijwe mu ikipe ya Rayon Sports.

Kubera amagambo yatangaje, Sugira  byatumye afatirwa ibihano n’ikipe ya APR FC, aho yahise ashyirwa mu ikipe y’abana ndetse akajya akatwa n’umushara buri kwezi, ibi byagizeho ingaruka uyu mukinnyi kuburyo atongeye no guhamagarwa mu ikipe y’igihugu Amavubi.

Sugira yamaze gusinyira Rayon Sports

Hari amakuru yavugwaga ko uyu mukinnyi yatijwe ikipe ya Police ndetse n’ikipe ya Gasogi yifuzaga kuba yamukinisha, ariko ubuyobozi bwa APR FC bwafashe umwanzuro wo ku mutiza muri Rayon kuko ariyo kipe nziza ngo izabasha kumuha umushahara w’ibihumbi 900 yahabwaga muri APR FC.

Kuri uyu wa Mbere tariki 30 Ukuboza 2019 nibwo amasezerano yo gutizwa uyu mukinnyi yashyizweho umukono.

Uyu rutahizamu w’imyaka 28 uzakinira Rayon Sports kugera mu mpeshyi ya 2021, yamenyekanye mu 2011 ubwo yafashaga ikipe ya AS Muhanga yari mu cyiciro cya kabiri aba rutahizamu watsinze ibitego byinshi kurusha abandi muri iyo shampiyona n’ikipe ye ihita izamuka. Yafashije iyi kipe yo ku ivuko kugera ku mukino wa nyuma w’igikombe cy’Amahoro 2013 mbere yo kwerekeza muri APR FC.

Yakiniye APR FC umwaka w’imikino 2013-14 na 2014-15 mbere yo kwerekeza muri AS Kigali yakiniye 2015-16. Sugira yaciye agahigo k’umukinnyi uhenze mu mateka ya ruhago y’u Rwanda icyo gihe kuko muri Gashyantare 2016 yasinyiye AS Vita Club yo muri RD Congo imuguze Miliyoni 100 (100 000 Frw).

Iyi kipe yo muri RD Congo yamuguze nyuma yo kwitwara neza agatsinda ibitego bine mu mikino y’igikombe cya Afurika cy’abakina mu bihugu byabo CHAN 2016 yabereye mu Rwanda, aho yafashije Amavubi kugera muri ¼ cy’iri rushanwa mpuzamahanga.

Ernest ukunda kwambara numero 16 yakiniye AS Vita Club umwaka umwe ahita asubira muri APR FC ariko ntiyahirwa no gukina imikino myinshi kubera ibibazo by’imvune.

Yitezweho gufatanya n’abandi bakinnyi ba Rayon Sports gushaka ibikombe Gikundiro izitabira uyu mwaka birimo icya shampiyona, icy’Amahoro, n’icy’Intwari .

 

Tanga Igitekerezo ukoresheje Facebook

SHARE