Tanasha Donna yafashe utwe asezera kuri Diamond n’umuryango we abashinja gukorana na shitani

Tanasha Donna wari umaze igihe ari mu rukundo n’icyamamare Diamond Platnumz kuri ubu yamaze gushyira iherezo ku rukundo rwabo ndetse afata utwe twose asubira iwabo muri Kenya. Mu butumwa burebure yanditse arashinja uyu muhanzi n’umuryango we gukorana n’amashitani.

Hari hashize imyaka isaga ibiri umuhanzi Diamond Platnumz ari mu rukundo na Tanasha Donna Oketch usanzwe ari umunyamakuru ukomeye muri Kenya.

Bagiye bavuga kenshi ko bagiye gusezerana imbere y’Imana bakabana mu buryo bwemewe n’amategeko ariko bikarangirira mu magambo kugeza ubwo ku itariki ya 2 Ukwakira 2019 bibarutse umwana w’umuhungu baje kwita Nasseb Junior.

Mu ntangiriro z’uyu mwaka nibwo byatangiye kuvugwa ko urukundo rw’aba bombi rwatangiye kuzamo amahari ariko banyirubwite birinda kugira icyo babivugaho. Ku munsi w’abakundana (St Valentin) wabaye ku itariki ya 14 Gashyantare, Diamond na Tanasha bagaragaye basohokanye bari mu munyenga w’urukundo bisa nk’ibinyomoje amakuru yavugwaga ko batabanye neza muri iyo minsi.

Ibintu byongeye gusubira rudubi ubwo kuri iki Cyumweru tariki tariki ya 2 Werurwe 2020 Tanasha yagize uburakari asiba amafoto yose yagaragaza iby’urukundo rwe na Diamond yari ku rukuta rwe rwa Instagram , ntibyarangiriye aho kuko yahise anamukura mubo akurikira kuri uru rubuga ndetse n’abo mu muryango we bose n’abandi bakorana muri Wasafi barimo Rayvanny, Lava Lava, Mboso, Queen Darleen.

Uyu mukobwa yahise yandika ubutumwa bure bure agira ati “Kugira umutima mwiza ni iby’agaciro n’ubukirisitu nta mafaranga ashobora kubigura. Urakoze Mana. Nshimishwa no kwigaragaza kwawe. Buri gihe iyo ufunze umuryango umwe iteka ufungura undi. Mutegereze inkuru mbafitiye mwese, by’umwihariko mwe gitsina gore beza nzabasangiza inkuru yanjye mbinyujije mu ndirimbo. Sinzagurisha na rimwe roho yanjye Imana irahari”.

Yakomeje ati “Abantu nk’aba nta roho bagira n’ubumuntu barabutaye, ni nko kubyinana n’amashitani. Bababarire ujye kure yabo ubareke. Rimwe na rimwe bisaba ingero kugira ngo umuntu bimubere isomo, senga cyane buri munsi!! Inshuro 5 ku munsi niba bishoboka, kubera ko guhuza n’umuntu wikunda ni nko gukorana na shitani ubwayo”.

Kuri uyu wa Kabiri yongeye kwandika kuri facebook avuga ko iki aricyo gihe ngo iby’urukundo rwabo bishyirweho akadomo ubundi akomeze ubuzima bwe.

Ati  “Nizeraga ko uyu mugabo ari umuntu wahindutse. Ariko ibikorwa bye byanyeretse ko nibeshye. Igihe kirageze ngo nsezere ku muryango wa Dangote. Amakuru ababaza umutima byarangiye hagati yacu twembi. Imana izi impamvu ibyo byagombaga kubaho. Reka nkomeze ubuzima bwanjye”.

Tanasha na Diamond batandukanye nyuma y’icyumweru kimwe gusa bakoranye indirimbo bakayita “Gere” ikaba iri mu zikunzwe cyane dore imaze kurebwa n’abarenga miliyoni 5 ku rubuga rwa Youtube.

Ubutumwa Tanasha yanyujije kuri Instagram.

Tanasha yanditse kuri facebook ko ibye na Diamond byarangiye.
Tanasha na Diamond n’umwana wabo w’umuhungu bise Nasseb Junior.

 

Tanga Igitekerezo ukoresheje Facebook

SHARE