Twivanye mu bibazo bitandukanye mu bihe bitandukanye, mubufatanye iyi ntambara ya Coronavirus tuzayitsinda- Perezida Kagame

Perezida Kagame yahumurije Abanyarwanda muri ibi bihe igihugu kiri mu ngamba zikomeye zo kurwanya ikwirakwira ry’icyorezo cya Coronavirus, abasaba gukomeza kubahiriza amabwiriza yashyizweho, avuga ko leta yiteguye gukora ibishoboka byose mu gusigasira imibereho myiza y’abaturage muri rusange by’umwihariko abatishoboye.

Ku mugoroba wo kuri uyu wa Gatanu tariki ya 27 Werurwe 2020 nibwo Perezida wa Repubulika y’u Rwanda, Paul Kagame yagejeje ijambo ku Banyarwanda nyuma y’iminsi 14 umurwayi wa mbere wa Coronavirus agaragaye mu gihugu ndetse na nyuma y’iminsi itandatu hakajijwe ingamba zigamije kurwanya ikwirakwira ry’iki cyorezo.

Perezida Kagame yabanje gushimira Abanyarwanda uko bitwaye mu byumweru bibiri bishize hagaragaye umurwayi wa mbere wa coronavirus, ngo buri wese hari icyo yakoze, ndetse ashima ubufatanye, ubwitange no kumvira amabwiriza abaturarwanda bakomeje kugaragaza.

Yavuze ko ibihe igihugu kirimo, byahungabanyije imibereho y’Abanyarwanda benshi, abizeza ko leta izakora ibishoboka byose igasigasira imibereho myiza yabo.

Yagize ati “Tuzi neza ko ibi bihe bitoroshye, byahungabanyije imibereho y’Abanyarwanda benshi ndetse mu gihugu hose, turabasa ko mwihangana, turatera intambwe nziza ntabwo dukwiye gutezuka. Leta izakomeza gukora ibishoboka byose ngo ifashe Abanyarwanda muri ibi bihe bitoroshye.”

Yakomeje agira ati “Ingamba zarafashwe n’izindi zizafatwa, kugira ngo abikorera bubake uburyo bakomeza gukora muri ibi bihe. Inzego zitandukanye zizategura uburyo abatishoboye bafashwa, hasigaye kubyihutisha.”

Perezida Kagame yavuze ko umubare wabamaze kugaragaraho ikicyorezo mu gihugu ari 54 kandi uzakomeza kuzamuka kuko hakomeje gushakishwa abahuye n’abarwayi kugira ngo bapimwe ndetse abagaragaweho uburwayi bavurwe.

Yasabye Abanyarwanda kugira uruhare mu iyubahirizwa ry’aya mabwiriza agamije ko iki cyorezo kidakomeza gukwirakwira hose, bakihanganira ingorane zose yaba yarabateye.

Ati “Abanyarwanda dushyize hamwe twivanye mu bibazo bitandukanye mu bihe bitandukanye, ubufatanye bwacu ndetse no kudatezuka birakenewe muri iyi ntambara turimo yo kurwanya iki cyorezo kandi tugomba kuyitsinda, nongeye kubasaba uruhare rwa buri wese mu bikorwa no mu myumvire, ingamba twafashe zatanze umusaruro mwiza, ibyemezo dufata uyu munsi ni byo bizatuma dushobora guhashya iki cyorezo vuba kugira ngo dusubire mu buzima busanzwe.”

Perezida Paul Kagame ageza ijambo ku Banyarwanda muri ibi bihe byo guhangana n’icyorezo cya Coronavirus.

 

Tanga Igitekerezo ukoresheje Facebook

SHARE