U Rwanda mubihugu 10 byambere ku isi birikwitwara neza muguhangana na Covid-19, Amerika mu myanya yanyuma, Uburundi na Tanzania ntibagaragara kuri uru ronde

Ikigo cy’ubushakashatsi Lowy Institute cy’i Sydney muri Australia cyatangaje uko ibihugu hafi 100 ku isi biri kwitwara mu guhangana na Covid-19, u Rwanda ruza mu bihugu 10 bya mbere.

Brazil niyo iza inyuma y’ibindi, Leta zunze ubumwe za Amerika nazo ziza mu bihugu 10 bya nyuma bihagaze nabi imbere y’iki cyorezo.

Lowy Institute ivuga ko yashingiye ku bipimo bitandatu ikora ubwo bushakashatsi n’igereranya ry’ibihugu, ibyo birimo ingano yo gupima iyi virusi ku mubare w’abaturage, imibare y’abandura, imibare y’abapfa, gusesengura amakuru atangwa n’izindi.

Iyi raporo igira iti: “Ubishyize hamwe, ibi bipimo byerekana niba ibihugu bihagaze neza cyangwa nabi mu guhangana n’iki cyorezo”

Inyuma ya New Zealand ya mbere – igihugu cyabashije guhashya rwose iki cyorezo kubera gahunda za ‘guma mu rugo’ no gupima benshi – Vietnam, Taiwan, Thailand, Cyprus, u Rwanda, Iceland, Australia, Latvia na Sri Lanka nibyo biza mu 10 bya mbere.

Mu kwezi kwa gatatu umwaka ushize, u Rwanda rwatangaje ‘guma mu rugo’ (lockdown) mu gihugu hose mbere y’ibindi bihugu byo muri Africa yo munsi y’ubutayu bwa Sahara, icyo gihe hari hamaze kuboneka 17 gusa banduye Covid.

Mu mezi yakurikiyeho,u Rwanda bwashimwe n’amahanga kwitwara neza no kwifashisha ikoranabuhanga rigezweho mu guhangana n’iki cyorezo. Imibare y’abandura n’abapfa nayo yakomeje kuba hasi.

Inkubiri ya kabiri ya coronavirus yazamuye imibare y’abandura n’abapfa ku isi. Mu Rwanda, muri uku kwezi gusa abanduye Covid-19 bashya barenze 1/3 cy’abanduye 14,166 bose hamwe kugeza ubu.

Naho abishwe n’iki cyorezo muri uku kwezi konyine barenze 1/2 cy’abo yishe 183 bose hamwe kuva yahagera, nk’uko biboneka mu mibare itangazwa na minisiteri y’ubuzima.
Raporo ya Lowy Institute itondekanya ibi bihugu ishingiye kuri ibyo bipimo bitandatu igatanga amanota ku 100, u Rwanda rufite 80%, ikindi gihugu cya Africa kiri hafi kuri urwo turonde ni Togo ya 15.

Ku rutonde rw’ibihugu 98 byakozweho ubu bushakashatsi Brazil ya nyuma ifite amanota 4%, naho Leta zunze ubumwe za Amerika ya 94 ikagira 17%.

Muri Brazil Covid-19 imaze kwica abagera ku 220,000 naho muri America imaze kwica abarenga 430,000.

Ibi bihugu byombi mu gihe cy’iki cyorezo byayobowe n’abategetsi boroheje iki cyorezo. Ba perezida Jair Bolsonaro na Donald Trump bombi barwanyije kwambara agapfukamunwa na gahunda za ‘guma mu rugo’, nyuma nabo ubwabo baje kurwara Covid-19.

Ibihugu nk’Ubushinwa, Tanzania, Burundi n’ibindi ntibiri kuri uru rutonde kuko “nta mibare bitanga” nk’uko iki kigo kibivuga.

Iyi raporo ivuga ko nta gihugu cyatsinze intambara yo kurwanya iki cyorezo kuko ikomeje, ahubwo ari uburyo bwo kukirwanya butandukanye.

Igira iti: “Ibihugu bimwe byakirwanyije neza kurusha ibindi – ibindi byitwara nabi…Muri rusange ibihugu bifite abaturage bacye n’inzego zikomeye bifite amahirwe mu guhangana n’iki cyorezo.”

Abanduye Covid-19 ku isi ubu bamaze kurenga miliyoni 100, hafi miliyoni 2.2 imaze kubica.

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE