Ubuzima buhagaze bute mu mujyi wa Gisenyi mu bihe byo kurwanya Coronavirus ?

Umujyi wa Gisenyi uherereye mu karere ka Rubavu mu ntara y’Uburengerazuba bw’Urwanda uhana imbibi n’umujyi wa Goma wo mu burasirazuba bwa Repubulika ya Demokarasi ya Congo. wafashe ingamba mu kongera isuku no guhangana n’abatubahiriza amabwiriza yashyizweho mu rwego rwo kwirinda ubwandu n’ikwirakwizwa ry’icyorezo cya Coronavirus.

Uyu mujyi wiganjemo ibikorwa by’ubucyerarugendo n’urujya n’uruza rw’ubucuruzi bwambukiranya imipaka muri iyi minsi byarahagaze. nta wambuka ajya i Goma, nta wucaracara mu mujyi mu ngendo zidafite akamaro n’ubigerageje ahura n’urukuta rw’abashinzwe umutekano. gusa mu nkengero zaho abaturage baragendagenda ntacyo binona !

Mu ngamba zafashwe harimo iz’uko buri mucuruzi w’ibiribwa ashyiraho aho abantu bakarabira, akambara utwenda turinda intoki n’utwenda dupfuka umunwa ndetse hagati y’umuguzi hakabamo intera ya metero imwe. izi ngamba kugeza magingo aya benshi ntibumva akamaro kazo nta n’uwatinya kuvuga ko hamwe zitubahirizwa na gato.

Amasoko y’ibiribwa ararema ufite agafaranga akabasha kugura icyo ashyira mu nda gusa hari abayobozi b’imidugudu usanga birukanka ku bagore bacururiza mu dusoko duto hari n’aho abacuruza ibiribwa ndetse na Serivisi zitumanaho bafungishwa n’inzego z’ibanze mu masaha y’amanywa ibintu byinubirwa cyane dore ko n’abo bayobozi uba ubona nta bwirinzi bafite bwatuma Coronavirus itabafata.

Ingendo zitari ngombwa.

Urujya n’uruza rwarahagaze mu mujyi wa Gisenyi rwagati ,urebye abantu baba bari mu muhanda ni abafite aho berekeje, kw’isoko,kwa muganga,kuma banki n’ahandi hantu ha ngombwa gusa hari n’abagendagenda ngo barambiwe kuguma mu rugo cyangwa ugasanga bateraniye kumabaraza no ku mihanda  baganira .ibintu bishobora gukwirakwiza icyi cyorezo mu gihe cyagera muri uyu mujyi.

Ingendo zitari ngombwa ntizemewe

Imibereho ihagaze ite muri ibi bihe ?

Benshi mu baturage bo mu mujyi wa Gisenyi n’abakora akazi gatandukanye higanjemo abakora ubucuruzi butandukanye bwambukiranya umupaka,abakarasi,abafundi n’abayedi n’abandi bakora akazi ka nyakabyizi baryaga bavuye gupagasa. abo bose muri iyi minsi barataka inzara kuko ntaho gukura icyo kurya. ubujura bumaze gufata indi ntera  aho ibisambo byitwikira ijoro bigatobora amazu y’abaturage hari naho bategera abantu bakabashikuza utwabo harimo ahitwa ku Cyanika ,Byahi,Rugerero n’ahandi.

Aba bose batabona ifunguro ry’umunsi bavuga ko ubuzima busa n’ubwahagaze bagatakambira Leta n’abagiraneza kubagezaho ifunguro kuko ntacyo kurya bafite. birumvikana aho bahahiraga harafunzwe nta n’uwemerewe gukora ibinyuranyije n’amabwiriza ya Leta mu rwego rwo guhangana n’icyorezo cya Coronavirus.

Mubaganiriye na IBYAMAMARE.COM bavuga ko ingamba Leta y’Urwanda yafashe zo guhangana n’icyorezo cya Koronavirusi ari nziza ariko hakwiriye kurebwa ku ngaruka zikomeye zirimo n’inzara abaturage bari guhura nayo.

“Ingamba Leta yafashe ni nziza cyane kuko iki cyorezo giteye ubwoba ariko tugiye kugwa mu nzu kubera inzara, nkanjye naryaga mvuye gukora ubuyede muri Goma ubu nirirwa mu nzu, mfite abana 4 n’umugore mba mu nzu y’ubukode kurya birakomeye abagiraneza batwiteho “

Undi muturage utuye mu Mbugangali we yemeza ko ubuzima busa n’ubwahagaze kuko nk’aho akodesha na nyiri nzu yatangiye kumwishyuza ubukode

“Ntago byoroshye aho mba na nyiri nzu yatangiye kunyishyuza,mfite abana batatu no kurya n’ikibazo, nyiri nzu sinamurenganya nawe atunze umuryango munini kandi inzu ye niyo yamutungaga gusa yihangane nzaba mwishyura “

N’ubwo benshi bataka inzara ariko banishimira kuba Leta yatangiye gahunda yo kubandika ngo bahabwe imfashanyo bakaba basaba inzego z’ubuyobozi kuba maso kuko mw’iyandika ryabazahabwa imfashanyo hatangiye kugaragaramo amanyanga.

“Inzego z’ubuyobozi zizashyiremo ubushishozi cyane turikwandikirwa mw’Isibo ugasanga harandikwa nyir’amazu abapangayi ntibandikwe bamwe ngo ntibazwi kandi bahatuye igihe kirekire ikindi ugasanga nk’umuntu udafite icyiciro cy’Ubudehe ntiyanditswe kandi mu by’ukuri bamwe baraje gupagasa bishyura na mituweli ku by’iciro by’ababyeyi babo. hazabeho gushishoza “

Uyu muturage Agira ati “Urugo rufite icyo rurusha urundi rwagitanga, tugafasha inzego zacu n’abayobozi bacu kugoboka abatishoboye kugira ngo tuzasohoke muri iki cyorezo nta wishwe n’inzara.”

S’abataka inzara gusa kuko nk’abivuriza ku bitaro bikuru bya Gisenyi bavuga ko nabo batoroherwa haba mu kubagezaho ingemu ndetse no gutaha iyo basezerewe mu bitaro bagasaba ko hashakwa uburyo byakorwamo neza

“Ibaze gusezerera umubyayi wabyaye abazwe ,kugera mu rugo n’bintu bikomeye cyane kuko nta modoka zitwara abagenzi nta moto n’ukuri bishobora gutera ikibazo gikomeye umubyeyi bashake uburyo nk’umubyeyi yajya afashwa kugera mu rugo”

“Ntago wakumva ukuntu kugeza ingemu hano ku bitaro bigorana, mu nzira biba bikomeye cyane ku bijyanye no gutambuka numva harebwa uburyo abantu bajya boroherezwa gutambuka mu nzira “

Ubuyobozi bw’akarere ka Rubavu buvuga ko ibibazo biri mu baturage hirya no hino buri kubikurikirana bugasaba abaturage gutuza no kugirana urukundo ufite icyo arusha mugenzi we akamufasha kandi hagakurikizwa amabwirizwa yashyizweho mu kwirinda Coronavirus.

Ubuyobozi buvuga ko abashaka gutanga ubufasha bwo kugoboka abakeneye ibyo kurya begera inzego z’ibanze kugira ngo hirindwe akavuyo, hagamijwe kurinda abaturage kwandura Covid-19.

Ubuyobozi bugasaba kandi ko muri iki gihe u Rwanda rukomeje gukaza ingamba zo kwirinda Coronavirus, abaturage bakwiye gukomeza kubahiriza amabwiriza, bakaraba intoki neza n’amazi n’isabune, no kuguma mu rugo birinda gukora ingendo zitari ngombwa.

Twabibutsa ko mu mujyi wa Goma muri RD Congo uhana imbibi n’umujyi wa Gisenyi kuwa 30 Werurwe 2020 hagaragaye umurwayi umwe wa Coronavirus nk’uko byatangajwe na INRB. n’ubwo imipaka yafunzwe abaturage bakaba basabwa kwirinda kuba banyura inzira z’ubusamo binjira muri RD Congo.

Minisiteri y’ubuzima itanga inama ko umuntu ugaragaje ibimenyetso bya Coronavirus yakwihutira guhamagara umurongo utishyurwa wa 114, agahabwa ubufasha adahise akora urugendo, cyangwa akitabaza umujyanama w’ubuzima umwegereye.

Tanga Igitekerezo ukoresheje Facebook

SHARE