Umuvugabutumwa wo muri Afurika yagerageje kunyomoza umuvugabutumwa mugenzi we amushinja kubeshya ko afite ubushobozi bwo kuzura abantu amusaba kuzura Nelson Mandela niba koko afite ubwo bushobozi.

Uyu muvugabutumwa wiyita umuhanuzi, Paseka Motsoeneng bakunda kwita “Mboro”, yahagaze hanze y’amarembo y’urusengero rwa Pasiteri Alph Lukau, maze asakuza agira ati : “Ndi hano gushaka ibisubizo.”

Paseka Motsoeneng bakunda kwita “Mboro”

Yavuze ko niba koko uyu mupasiteri mugenzi we afite ububasha bwo kuzura abapfuye, bagomba kujyana ku gituro cya Nelson Mandela nawe akamuzura.

Ni nyuma ya video yakwirakwijwe ku mbuga nkoranyambaga igaragaza Pasiteri Lukau azura umuntu wari mu isanduku akongera kugaruka mu buzima abayoboke bagakoma mu mashyi.

Motsoeneng rero yageze ku rusengero rwa Lukau ruherereye hafi ya Johannesburg agira ati : “Ntabwo naje hano guhangana n’uwo ari we wese, naje hano gushaka ibisubizo kuva ku muvandimwe wanjye muri Nyagasani,”

Yakomeje agira ati : “Niba ari ukuri warazuye umuntu, ngaho reka tujye ku gituro cya Mandela ukore nkabyo.”

Uyu muvugabutumwa Mboro ugerageza kunyomoza mugenzi we ariko nawe yigeze guhabwa urw’amenyo nyuma yo kuvuga ko yagiye mu ijuru ndetse agafata amafoto yahoo akoresheje telephone ye ya smartphone.

Perezida Cyril Ramaphosa wa Afurika y’Epfo rero yaje kugira icyo avuga kuri ibi bintu kuri uyu wa Kane, atangaza ko guverinoma ikwiye gufatira ibyemezo abayobozi b’amadini bafite imikorere ikemangwa, bakabeshya abaturage.

Perezida Ramaphosa ati : “Ntabwo dushaka kwivanga mu myizerere y’iyobokamana y’abantu, ariko tugomba kuganira ku kuntu twakwita kuri aba bapasiteri b’ibinyoma.”

Pasiteri Alph Lukau yahamije ko yazuye umuntu wari washizemo umwuka

Hagati aho nk’uko iyi nkuru dukesha Daily Monitor ikomeza ivuga, sosiyete zigera kuri eshatu zikora ibijyanye no gushyingura, zatangaje ko zatekewe imitwe n’abakuriye itorero rya Lukau kugirango bagere ku mugambi wabo wo kubeshya ko bafite ubushobozi bwo kuzura abapfuye. Aba bakaba batangiye gukurikirana iri torero ngo bakure icyasha ku bigo byabo.

Tanga igitekerezo

Ntugire ikibazo Email yawe ntabwo tuyigaragaza kurubuga (*).

Ibitekerezo(0)