Uganda igiye gushyiraho igihano cy’urupfu ku batinganyi

Minisitiri wa Uganda ushinzwe imyitwarire myiza n’ubunyangamugayo (ethics and integrity) witwa Simon Lokodo avuga ko mu gihe gito kiri imbere umushinga w’Itegeko ryo guhanisha ‘abatinganyi’ igihano cy’urupfu uzagezwa mu Nteko. Yizeye ko uzatorwa ukaba itegeko, abatinganyi bagahanwa bikomeye kuko ngo ubutinganyi atari indangagaciro y’abatuye Uganda.

Lokodo avuga ko ikibabaje ari uko abatinganyi babaye benshi kandi ngo bakaba bajya mu bigo by’amashuri gushaka yo ababakurikiza.

Ati: “Abantu bagomba kumenya ko ubutinganyi butari mu ndangagaciro z’abatuye Uganda. Mu minsi myinshi ishize twabonye amakuru ko abatinganyi bagiye mu mashuri bagashakamo urubyiruko binjiza mu bikorwa byabo, bababeshya ko gutingana (abaryamana bahuje igitsina) ari ibintu bivukanwa kandi si byo, ni ingeso mbi abantu bigisha abandi.”

Kamau na Njoroge bo muri Kenya bakoze ubukwe bemeranya kubana nk’umugore n’umugabo kandi bose ari abagabo

Avuga  ko umushinga w’itegeko uvuga ko umuntu ushishikariza abandi gutingana na we azahanwa nk’uwafashwe abikora.

Muri Gashyantare, 2014 hari itegeko Perezida Museveni yasinye ryitwaga ‘Mwice Abatinganyi’ (Kill the Gays) ariko riza kwamburwa uburemere nyuma y’uko hari Abadepite bavuze ko ritatowe ku bwiganze.

Ryambuwe uburemere muri Kanama, 2014.

Hari abavuga ko ryambuwe uburemere bitewe n’igitutu Leta zunze ubumwe za Amerika zashyize ku butegetsi bw’i Kampala.

Icyo gihe USA yategekwaga na Barack Hussein Obama.

Min Samuel Lokodo avuga ko kuri iyi nshuro hari ikizere ko Abadepite benshi bazemeza ko umushinga wa ririya tegeko uhinduka itegeko.

Ngo babicengeje muri benshi mu Badepite.

Ikindi kandi ngo Uganda yiteguye kuzahangana n’ingaruka zose zizakurikiza itorwa n’ishyirwa mu bikorwa bya ririya tegeko.

Muri Kenya abatinganyi babikora nta nkomyi, aba Brian Waititu na Eric Kamande, umwe yateye ivi asaba mugenzi we ko yamubera umugore

Bamwe mu bayobozi b’ihuriro ry’abatinganyi muri Uganda bavuga ko bafitiye impungenge ubuzima bwabo kubera ko no muri 2014 bari bugarijwe.

Hari umwe muri bo witwa Onziema uvuga ko muri uyu mwaka hari abatinganyi batatu n’umugore w’ikinyabibiri biciwe muri Uganda ndetse ngo no mu cyumweru gishize hari uwo bishe banize.

The Reuters

Tanga Igitekerezo ukoresheje Facebook

SHARE