Umuhanzi Joeboy uri kubica muri iyi minsi ategerejwe i Kigali mu gitaramo cya Jazz Junction

Joeboy uri mu bahanzi bagezweho cyane ku mugabane ategerejwe i Kigali mu gitaramo cya Jazz Junction gisoza ukwezi kwa Gashyantare 2020.

Joeboy ukomoka muri Nigeria yatumiwe nk’umuhanzi w’Imena mu gitaramo cya Kigali Jazz Junction nyuma yo gutorwa na benshi agatsinda Innos B ukomoka muri Congo na Stella Mwangi wo muri Kenya mu matora yakorewe ku rukuta rwa twitter y’abategura ibi bitaramo.

Uyu musore ufite imyaka 23 y’amavuko ubusanzwe yitwa Joseph Akinfenwa Donus, aririmba mu njyana ya Afropop na R&B. Yamenyekanye mu ndirimbo zitandukanye harimo nka ‘Beginning’ ‘All For You’ na ‘Baby’ yamufashije kwigarurira imitima ya benshi mu bakunzi ba muzika byumwihariko abari n’abategarugori.

Kugeza ubu amaze gukora album imwe yise ‘Love & Light’ akaba aherutse gushyirwa ku rutonde rw’abahanzi bo kwitega muri 2020. Usibye umuziki Joeboy yize muri Kaminuza ya Lagos izwi nka UNILAG aho yakuye impamyabumenyi mu bijyanye n’imicungire y’abakozi.

Ni ku nshuro ya mbere azaba ataramiye mu Rwanda, bikaba biteganyijwe ko azagera i Kigali mu ijoro ryo kuri uyu wa Gatatu naho igitaramo kikazaba kuwa Gatanu tariki ya 28 Gashyantare 2020 mu mahema ya Camp Kigali(KCEV).

Muri iki gitaramo Joeboy azafatanya n’umunyarwanda Davis D ukunzwecyane mu ndirimbo ‘Dede’ ndetse na Niyo Bosco, bakazacurangirwa mu buryo bwa live na Neptunez Band ndetse na Nep Djs izasusurutsa abitabiriye.

Kwinjira ni 10.000Frw mu myanya isanzwe, 20.000 mu myanya y’icyubahiro, 25.000Frw mu myanya y’ikirenga na 200.000Frw ku meza y’abantu umunani (8).

Niyo Bosco nawe azarirmba muri iki gitaramo.

Reba hano indirimbo ya Joeboy iri guca ibintu:

 

Tanga Igitekerezo ukoresheje Facebook

SHARE