Umukinnyi wa Espoir BBC yatereye ivi muri Kigali Arena asaba umukunzi we ko bazarushinga (Video)

Rukundo Fabrice usanzwe akinira ikipe ya Espoir Basketball Club yari umwe mu bakinnyi b’intyoza bari batoranyijwe gukina All Star game 2019, yatunguye umukobwa bakundana imbere y’imbaga yari yuzuye Kigali Arena atera ivi amusaba ko yazamubera umugore anamwambika impeta ibishimangira.

Mu ijoro ryo kuri uyu wa Gatanu tariki ya 1 Ugushyingo 2019 nibwo muri Kigali Arena habereye umukino wa All Star 2019 wasozaga umwaka w’imikino ya Basketball.

Ni umukino wahuzaga abakinnyi batoranyijwe nk’intyoza zahize abandi mu mwaka wa 2018/2019, Rukundo Fabrice yari mu bakinnyi bari bayobowe na Mugabe Aristide bahanganye n’abandi bari bayobowe na Nijimbere Guilbert.

Fabrice yari kandi mu barushanwaga gutsinda amanota atatu ndetse no mu batsinda dunk ari nabyo byabanjirije umukino nyirizina.

Ubwo Fabrice yarushanwaga gutsinda dunk bageze mu cyiciro cya kabiri, yaje guhamagara umukunzi we wari hafi aho mu baje kureba umukino ndetse n’abandi basore babiri.

Yabanje kujijisha bisa naho agiye gutsinda umupira abasimbutse uko bari batatu, mu gihe umukunzi we yari ahindukiye uyu musore yahise aca bugufi apfukamisha ivi rimwe n’impeta mu kiganza maze amusaba ko yazamubera umugore undi nawe ntiyazuyaza ati ‘yego’.

Ni ibirori byinshimiwe na benshi, ari nako bafata amafoto  y’iki gikorwa abandi babaha amashyi.

Uyu mukino ukaba warangiye ikipe yari irangajwe imbere na Niyijimbere Guibert itsinze iya Mugabe Aristide amanota 89 kuri 83.

 

Tanga Igitekerezo ukoresheje Facebook

SHARE