Umukobwa wo muri Uganda w’imyaka 15 wakinanye na Lupita Nyong’o muri filime yamamaye cyane ku isi, yapfuye

Umukobwa wo muri Uganda wakinnye muri filime ‘Queen of Katwe’ cyangwa ‘Umwamikazi w’i Katwe’ ugenekereje mu Kinyarwanda, ivuga ku muhanga mu mukino wa ‘chess’ w’ahantu h’akajagari ho muri Uganda, yapfuye afite imyaka 15, nkuko bitangazwa n’ibitangazamakuru byo muri Uganda.

Uwo mukino ujya kumera nk’igisoro kigezweho.

Nikita Pearl Waligwa yari yarasanganwe indwara y’ikibyimba cyo mu mutwe.

Nikita Pearl Waligwa yari amaze kwamamare cyane muri Uganda

Iyo filime yakinnyemo yo mu mwaka wa 2016 ishingiye ku nkuru mpamo y’uwitwa Phiona Mutesi, watangiye gukina ‘chess’ afite imyaka icyenda y’amavuko nubwo atigeze agera mu ishuri.

Nyuma yaje no guhatana muri uwo mukino mu marushanwa yo ku rwego mpuzamahanga.

Irimo kandi na Lupita Nyong’o, ukina ari nyina w’uwo mwana, ndetse na David Oyelowo ukina ari nk’umwarimu we wa ‘chess’.

Waligwa akina yitwa Gloria, inshuti ya Phiona umusobanurira amategeko agenga umukino wa ‘chess’.

Lupita Nyong’o, akina ari nyina w’uyu mwana

Mu mwaka wa 2016 ni bwo bwa mbere yapimwe agasanganwa indwara y’ikibyimba cyo mu mutwe.

Ndetse amakuru avuga ko Mira Nair, wayoboye filime ‘Queen of Katwe’, yakusanyije inkunga yo gufasha kumuvuriza mu Buhinde.

Amagambo y’abaganga bo muri Uganda yasubiwemo mu bitangazamakuru bavuga ko bo batari bafite ibikoresho bya ngombwa byo kumwitaho.

Mu mwaka wa 2017 ni bwo yabwiwe ko ubuzima bwe butakiri mu kaga kubera iyo ndwara, ariko mu mwaka ushize aza gusanganwa ikindi kibyimba cyo mu bwonko.

Tanga Igitekerezo ukoresheje Facebook

SHARE