Umuraperi Fireman n’umusirikare bareganwa barekuwe

Uwimana Francis wamenyekanye mu muziki nka Fireman na Cpl Murwanashyaka Modeste barekuwe byagateganyo n’urukiko rukuru rwa gisirikare.

Kuri uyu wa Mbere tariki 27 Mutarama 2020 nibwo aba bombi basubiye mu rukiko maze rwanzura ko barekurwa by’agateganyo bagakurikiranwa bari hanze.

Fireman na Cpl Murwanashyaka Modeste wigishaga i Iwawa bakurikiranyweho icyaha cy’ubufatanyacyaha mu gukubita no gukomeretsa bakoreye mu Kigo Ngororamuco cya Iwawa.

Umucamanza yavuze ko kuba Cpl Murwanashyaka Modeste yarageze Iwawa tariki 05 Ugushyingo 2018 akahava tariki 28 Ugushyingo 2018 kandi uwitwa Gisubizo Fabien ashinjwa kuba yarakubiswe avuga ko yakubiswe mu Ukuboza 2018 bishingirwaho byemezwa ko nta mpamvu zikomeye akekwaho iki cyaha.

Ikindi ni uko impapuro za muganga zigaragaza ko Gisubizo Fabien afite inkovu ku itako mu gihe we avuga ko yavunitse igufa rya ruseke.

Ibi kandi Cpl Murwanashyaka Modeste abihuriyeho na Uwimana Francis Fireman nawe urukiko rwanzuye ko nta mpamvu zikomeye zituma akekwaho iki cyaha.

Urukiko rushingiye ku ngwate y’ikibanza kiri mu Kagali ka Ayabaraya mu Murenge wa Masaka cya Muhire Jean Claude (Jay C) rwemeje kurekura Fireman by’agateganyo.

Cpl Murwanashyaka Modeste nawe yarekuwe ndetse ahita asabwa gusubira mu mutwe wa gisirikare yabarizwagamo mu gihe kitarenze iminsi itanu.

 

Tanga Igitekerezo ukoresheje Facebook

SHARE