Search

Umuraperi Riderman arizihiza isabukuru y’imyaka 31, menya byinshi ku rugendo rwe muri muzika

NAWE WATUNGA IMODOKA Y'INZOZI ZAWE, KANDA HANO WIGURIRE IMODOKA ZIHENDUTSE GUHERA KU MAFARANGA IBIHUMBI 100 GUSA

KANDA HANO UREBE VIDEO

Ubusanzwe yitwa Gatsinzi Emery benshi bamuzi mu muzika nka ‘Riderman’ akaba akora injyana ya Hip Hop, kuri uyu wa 10 Werurwe 2018 arizihiza isabukuru y’imyaka 31 y’amavuko na 13 amaze muri muzika. Tukaba twabakusanyirije bimwe mu bihe byingenzi byaranze urugendo rwe muri muzika.

Riderman arizihiza isabukuru y’imyaka 31 y’amavuko kuri uyu wa Gatandatu.

Riderman afatwa nk’umuraperi uyoboye abandi mu muziki wo mu Rwanda, yabonye izuba ku itariki ya 10 Werurwe 1987 avukira i Bujumbura mu Burundi. Niwe mfura mu bavandimwe batanu bavukana; abahungu batatu n’abakobwa babiri.

Amashuri abanza yayize kuri Ecole Primaire Kabusunzu maze ayisumbuye ayiga muri Groupe Scolaire St Andre, aho yakuye impamyabumenyi muri sciences humaines.  Amashuri ya kaminuza yayakomereje muri Universite Libre de Kigali (ULK) mu bijyanye n’ubukungu n’icunga mutungo ariko ntiyaharangirije kuko mu 2008 yaje kuhava yerekeza muri kaminuza yigisha ibijyanye n’Ubukerarugendo, Ikoranabuhanga n’Ubushabitsi  (UT B) mu ishami ry’ubury’ubukerarugendo n’icunga mutungo ariko naho ntiyaharangiriza.

Mu mwaka wa 2005 nibwo Riderman yatangiye kuririmba, muri Gicurasi 2006 yaje kwinjira mu itsinda rya UTP Soldies ryari rigizwe n’abasore babiri aribo Neg G the General na MIM, aba bari basanzwe ari n’inshuti ze zikomeye dore ko bari banaturanye Kimisagara aho bita mu Kamenge.

Iritsinda ryaje gukundwa cyane bakorana indirimbo zigera ku munani, mu 2007 Riderman yaje gushyira hanze indirimbo ye ya mbere ari wenyine ayita “Turi muri Party” nyuma hatangira kuvugwa ubwumvikane bucye hagati ye na bagenzi be bari bafatanyije itsinda bizanokurangira arivuyemo akomeza muzika ku giti cye.

Riderman wari wiyemeje gukomeza muzika nk’umuhanzi ku giti cye, yakomeje gushyira hanze indirimbo zitandukanye zagiye zikundwa cyane ndeste zinamufasha kwigarurira imitima ya benshi mu bakunzi b’injyana ya Rap mu Rwanda. Kuya 29 Ukuboza 2008 nibwo yashyize ahagaragara album ye ya mbere yari igizwe n’indirimbo 16 ‘Inkuba’ ari nayo yitiriye iyi album ‘Rutenderi’ ‘Uwo mukobwa’ n’izindi..

Riderman yaje gutangiza inzu itunganya indirimbo ayita ‘Ibisumizi’ icyo gihe nibwo yatangaje ko n’abakunzi be bose bitwa Ibisumizi. Iyi nzu yaje kumenyakanye cyane ndetse inazamura benshi mu bahanzi bari bashya nka Ama G The Black, Queen Cha n’abandi..

Akunze kwiyita Umugaba Mukuru w’Ibisumizi.

Kugeza ubu Riderman amaze gushyirahanze album 7 na Mixtape imwe aherutse no kumurika mu gitaramo yakoreye kuri petiti stade mu Kuboza 2017, uyu muhanzi uyoboye abandi mu bakora Rap mu Rwanda yagiye atsindira ibihembo bitandukanye, twavuga nko mu mwaka wa 2008 ubwo yatsindiraga igihembo cye cyambere muri  Salax Award nk’umuhanzi mwiza wa Hip hop mu Rwanda, Muri 2010 album ye yatsindiye igihembo cy’inziza nanone muri Salax Awards ndetse n’ibindi, uyu muhanzi kandi yanegukanye irushanwa rya PGGSS3 muri 2013.

Bimwe mu byo uyu muhanzi yishimira harimo nko kuba muri Kanama 2012 yagiye muri Leta Zunze Ubumwe z’Amerika aho yari yitabiriye inama y’abahanzi ba Hip Hop yitwa “Hip Hop and Physics Engagement”. Harimo kandi no kuba yaragiye akorana ibitaramo n’abahanzi b’ibyamamare bitandukanye nawe yakuze yumva nka Shaggy, Sean Paul, Koffi olomide, Elephant Man n’abandi batandukanye.

Mu bahanzi bo mu Rwanda akunda harimo Jean-Christopher Matata, Benjamin Rutabana na Kidumu naho abo hanze akunda ni Tupac Amaru Shakur, 50 Cent, Lil Wayne na Diam’s.

Muri 2015 nibwo Riderman yashyingiranywe n’umukunzi we Miss Agasaro Nadia, kuri ubu bakaba bafitanye umwana umwe.

IBYAMAMARE.Com tumwifurije kugira isabukuru nziza y’amavuko.

Riderman yarushinganye na Miss Agasaro Nadia muri 2015.

 

 

Ivan Heritier

Comments

comments




Leave a Reply

Your email address will not be published. Required fields are marked *