UNICEF na Airtel Africa bahuje imbara mu gufasha abana n’imiryango yibasiwe na COVID-19

Nyuma yuko umubare munini w’abana ukomeje kugerwaho n’ingaruka z’ihagarikwa ry’amashuri kubera icyorezo cya Covid-19, Airtel Africa na UNICEF batangije ubufatanye bushya bugamije guha abana amahirwe yo kwigira kuri internet no kugeza ubufasha  bw’amafaranga ku miryango yabo binyuze kuri telefone.

Kuri uyu wa 20 Gicurasi 2020 nibwo izi mpande zombi zatangaje ku mugaragaro ubu bufatanye i Dakar muri Senegal n’i Nairobi muri Kenya.

Binyuze muri ubu bufatanye, UNICEF na Airtel Africa  bazafasha abana kwigira mu rugo no kugeza ubufasha  bw’amafaranga ku miryango yabo binyuze kuri telefone. Hazifashishwa ikoranabuhanga rya telephone mu gufasha abana bari mu kigero cy’ishuri bagera kuri miliyoni 133 bagezweho n’ingaruka z’ihagarikwa ry’amashuri mu bihugu 13 mu karere ka Afurika yo mu majyepfo y’ubutayu bwa Sahara muri iki gihe cya COVID-19.

Ibyo bihugu ni u Rwanda, Tanzaniya, Uganda, Zambia, Tchad, Congo, Repubulika Iharanira Demokarasi ya Congo, Gabon, Kenya, Madagascar, Malawi, Niger na Nigeria.

Airtel Africa izakuraho ibiciro byose ku birebana no gukoresha imbuga zikora ibijyanye no gutanga amasomo, ibi bikazafasha abana guhabwa amasomo ku buntu. Kwigira mu rugo, hifashishijwe ibikoresho by’ikoranabuhanga, biri mu bintu byingenzi UNICEF izakoresha mu gufasha abana bashobora kubona ibikoresho by’ikoranabuhanga gukomeza gukurikirana amasomo mu ngo zabo.

Umuyobozi mukuru wa Airtel Africa bwana Raghunath Mandava, yavuze ko ubu ari bumwe mu buryo bwiza bwo gufasha imiryango guhangana n’ingaruka za Covid-19.
Yagize ati “Bumwe mu  buryo bwiza bwo gufasha imiryango guhangana n’ingaruka z’iki cyorezo hari ugutanga interineti y’ubuntu ku mbuga zatoranyijwe zifasha abana gukomeza kwiga mu gihe cy’ihagarikwa ry’amashuri  no gushyiraho gahunda zo kohererezanya amafaranga mu rwego rwo kugabanya guhura kw’abantu bahererekanya amafaranga mu ntoki”

Umuyobozi wungirije ushinzwe ikusanyamakuru no guhanga udushya muri INICEF, bwana Fayaz, yavuze ko ubu bufatanye buzaha UNICEF uburyo bwo gukuraho imbogamizi zijyanye n’amafaranga ku miryango imwe n’imwe itishoboye mu karere, harimo myinshi iyahungabanyijwe n’ihagarikwa ry’ibikorwa byayinjirizaga amafaranga. Ibi bituma tubasha gufasha imiryango guhangana n’ibibazo by’ubuzima n’ubukungu byatewe n’icyorezo cya COVID-19.

Ubufatanye na Airel Africa buzafasha muri Gahunda ya UNICEF yiswe Global Agenda for Action igenewe abana. Iyi gahunda igaragaza icyo abikorera ku giti cyabo n’ibigo bya leta kw’isi yose basabwa gukora mu rwego rwo gufasha umubare munini w’abahungu n’abakobwa –harimo n’abagezweho n’ingaruka z’amakimbirane, abana babana n’ubumuga, hamwe n’abana b’abakobwa bashobora guhura n’ihohoterwa- kugira ubuzima bwiza, umutekano no guhabwa ubumenyi..

 

Tanga Igitekerezo ukoresheje Facebook

SHARE