Mu buzima birasanzwe ko buri kintu cyose kigerwaho binyuze mu nzira runaka. No mu rukundo rero hari intambwe zigomba guterwa kugira ngo abakundana bashyikirane bihagije.

Hari abatera intambwe zose mu gihe kirekire maze nyuma bakagera ku musaruro w’ibyo bakoze ari byo gusezerana amasezerano yo kubana, mu gihe hari n’abatangira neza ariko bikarangira ibyabo bitagezweho bitewe n’uko izo ntambwe zitatewe neza cyangwa se bitewe nuko bagarukiye hagati.

Uyu munsi IBYISHIMO.com bigiye kubagezaho zimwe mu ntambwe z’ingenzi zatuma abakundana barambana haba mu busore bwabo ndetse na nyuma yo gushinga urugo rwabo.


1. Intambwe yo gukururwa (Attraction stage)

Mbere y’uko habaho kugirana ibiganiro no gukundana, burya hari imbaraga ituma umwe akurura undi, ibyo bigafatwa nk’intambwe ya mbere ituma izindi zikurikiraho zizageza abakundana kuzabana.

Ni kuri iyi ntambwe usanga akenshi ikururira abasore gutekereza ku bakobwa akenshi bashingiye ku bwiza Imana yabaremanye. Aha ni ho usanga buri umwe afata mugenzi we nk’intungane itagira inenge, akamubonaho ibyiza gusa.

2. Intambwe y’ibigaragarira amaso (Reality stage)

Iyo bigeze kuri uru rwego ni ho ababiri batangira kwigana (umwe akamenyaka n’undi) aho umwe aba areba byinshi atari azi mu mizo ya mbere yo guhura kwabo.

Muri iki gihe umwe atangira kubona intege nke za mugenzi we n’aho afite imbaraga, akabona amakosa ye ndetse n’ibindi bituma agira icyo anenga cyangwa se ashima mu mico imuranga. Iyo bigeze kuri uru rwego ngo ntuba ukibona mugenzi wawe nk’intungane nk’uko wabikekaga. Aha kandi ni na ho umenyera niba uzihanganira imico ye cyangwa we azihanganira iyawe.

Abenshi usanga bananirwa iyo bageze ku ntambwe ya kabiri kuko ibyo babona biba bitandukanye n’ibyo batekerezaga bashaka kwinjira mu rukundo byimbitse.

3. Intambwe y’ibikorwa (THE WORK STAGE)

Ubundi umushyikirano mwiza utangira neza mu gihe abakundana batangiye kugaragaza ibikorwa byabo umwe yita ku wundi kugira ngo uwo mushyikirano uzatange umusaruro.

Ni yo mpamvu mu gihe ku mpande zombi habayeho kwihanganirana kubw’intege nke haba hakenewe kwigaragaza umwe yita kuri mugenzi we mu rwego rwo gukuza urukundo mu mitima yabo babigaragariza mu bikorwa bifatika binasaba ubwitange.

Kuri iyi ntambwe aho umwe aba yigaragariza mugenzi we ni ho urukundo rwabo rugeragezwa inshuro nyinshi kuko umwe aba ashaka gukora ibishimisha mugenzi we.

4. Intambwe yo gushikama (STABILITY STAGE)

Iyo umutima wawe wamaze kukwemeza ko ugomba kwemera imico ya mugenzi wawe yaba amakosa cyangwa imbaraga ze, igikurikiraho ni ukumaramaza ku masezerano mugirana buri munsi no kwirundurira mu rukundo burundu.

Ibi ntibivuze ko hatazigera havuka impaka hagati y’abo bantu ahubwo iyo bigeze kuri uru rwego ni ho biga gukemura ibibazo bigenda bivuka, bakiga kwihangana mu gihe bigaragaye ko hari uwaguye mu ikosa.

Aha kandi ngo ni ho abakundana batangira kumva uburyohe bw’urukundo rwabo kuko ahari ukubabarira haboneka amahoro n’umutuzo muri bo, maze urukundo rukaryoha kakahava.

5. Intambwe yo kwitanga utizigamye (THE COMMITMENT STAGE)

Iyo umubano w’abakundana unyuze muri izo nzira uko ari 4 nta kiwukomye mu nkokora, igikurikiraho ni uko bombi bareka imikino bakagera ku ntambwe yo kwitanga batizigamye.

Uku kwitanga kwabo ngo kugomba kujyana n’intumbero imwe y’ahazaza idashingiye ku kwinezeza ahubwo ireba iterambere rirambye, imibereho yabo n’abazabakomokaho n’ibindi, icuyo gihe baba batangiye gutekereza kubaka urugo no gusezerana ya masezerano y’abashakanye.

Kuri iyi ntambwe ni bwo utangira kumva inzogera ikubwira iby’ubukwe n’uko ugombwa kubyitwaramo ngo buzagende neza, utekereza ku ngengo y’imari uzakoresha, ibyo uzakenera ngo ubukwe buzagende neza, inshuti zizakuba hafi, abazakwambarira, n’ibindi.

Ikibazo kivuka ryari ? Usanga hari abahera ku ntambwe ya mbere yo kubona umuntu akagukurura ugahita usimbuka ujya ku ntambwe ya nyuma. Abandi batsindwa kubera ko batita ku bimenyetso bigaragara mu ntambwe zo hagati maze bakirengagiza ibyo bagenda babona mu rukundo ntibafate imyanzuro babishingiyeho ahubwo bagahubukira kubana n’abantu bamaze igihe babereka ko kubana kwabo hazazamo ibibazo.

Ibyo bikaba intandaro y’amakimbirane adashira no gutandukana kw’abashakanye maze ibyari ibitwenge bigahinduka amarira.

Leave A Comment

Ntugire ikibazo Email yawe ntabwo tuyigaragaza kurubuga (*).