Uturere twa Rubavu na Rusizi twashyizwe mu kato, ahandi moto n’imodoka byemerewe gutwara abantu, utubari n’insengero turakomeza gufungwa

Inama y’Abaminisitiri yafashe ingamba zitandukanye zigamije gukomeza kwirinda ikwirakwira ry’icyorezo cya Coronavirus, zirimo ko moto zitwara abagenzi zemerewe gusubukura ibikorwa uretse mu turere twa Rusizi na Rubavu, ndetse ko ingendo hagati y’intara zemewe ariko ko kujya no kuva mu Karere ka Rusizi na Rubavu byo bibujijwe.

Iki cyemezo kizongera gusuzumwa nyuma y’iminsi 15 kirashyira mu kato Uturere twa Rusizi na Rubavu twegereye umupaka w’u Rwanda na Repubulika ya Demokarasi ya Congo.

Inama y’Abaminisitiri yaraye iyobowe na Perezida Paul Kagame yakomoreye ingendo hagati y’Intara n’Umujyi wa Kigali, ndetse na moto zemererwa gutwara abagenzi uretse mu Turere twa Rusizi na Rubavu.

Muri turiya Turere tubiri nta moto yemerewe gutwara abagenzi, ndetse n’imodoka ntizemerewe gutwara abantu mu buryo bwa rusange, nta n’ubwo ingendo hagati yatwo n’ahandi mu gihugu zemewe uretse gusa amakamyo yajyanayo ibyo kurya n’ibindi bikoresho nkenerwa.

Inama y’Abaminitiri yarekeyeho amabwiriza yo gufunga Utubari n’insengero n’andi makoraniro y’abantu benshi.

Tariki ya 1 Kamena 2020 ni yo yari yagenwe ngo moto zongere kwemererwa gutwara abagenzi i Kigali n’ahandi hose, kimwe n’ingendo hagati y’Intara n’Umujyi wa Kigali kuba zasubukurwa, ariko ikemezo kiza gukurwaho n’itangazo ryasohowe n’Ibiro bya Minisitiri w’Intebe, bigaragaza ko ishyamba atari ryeru.

Inama y’Abaminisitiri yamenyesheje Abaturarwanda ko Coronavirus ihari, bityo ko bagomba gukomeza kubahiriza ingamba zo kwirinda kwandura cyangwa kwanduza abandi. Abajya kuri moto n’Abamotari barakomeza kubahiriza amabwiriza y’isuku, gutera umuti muri casque, no kwambara agapfukamunwa.

Tanga Igitekerezo ukoresheje Facebook

SHARE