Uwagaba Caleb yasohoye igitabo “Iminsi ijana twubatse urugo”kirimo inkuru ivuga uburyo yakoze ubukwe nyuma y’amezi 7 umugore agahita apfa

Ev. Uwagaba Caleb Joseph wamenyekanye nk’umujyanama wa Papa Emile, yasohoye igitabo mbarankuru (Novel/Roman) yise “Iminsi ijana twubatse urugo” kirimo inkuru ishushanya inzira yanyuzemo n’umugore mu mezi atandatu agahita yitaba Imana.

Iki gitabo cy’inkuru ndende, kigaruka ku buzima bwite bwa Caleb Uwagaba yabayemo mbere y’uko akora ubukwe n’uwahoze ari umukunzi we Mucyo Sabine wapfuye bamaranye amezi arindwi gusa azize uburwayi.

Umugore wa Caleb yapfuye bamaze amezi 7 bakoze ubukwe

Ibibazo byatangiye kumugeraho bitewe no kubura uwari umugore we wazize indwara yitwa Systemic Lupus Erythematosus (indwara mbi igaragazwa n’iyangirika ry’uturemangingo).

Uwagaba Caleb Joseph wanditse iki gitabo, avuga ko yacyanditse kubera impamvu eshatu.

Ati “Iya mbere ni ugusohoza amasezerano nasezeranyije umugore wanjye nyakwigendera Sabine no gusohoza inzozi ze. Igihe twari mu bitaro, njye na we twafashe gahunda yo kwandika igitabo kugira ngo dusangize Isi ibyatubayeho nyuma y’ubukwe.

Mu bisanzwe, nyuma y’ubukwe bakunze kuvuga ko ukwezi kubanza ari ukwa bukini, ariko rimwe na rimwe hashobora kubaho ingorane zitunguranye.

Ibyumweru bibiri nyuma y’ubukwe bwacu, ubuzima bwatangiye kutururira burangwa no kurakara, kubabara no guhagarika umutima kandi uko bucyeye n’uko bwije birushaho kwiyongera.

Amezi atandatu mbere y’urupfu rw’umugore wanjye yaranzwe n’inzara, kudasinzira, umunaniro, n’intimba.”

Caleb avuga ko Impamvu ya kabiri ari “ugukomeza ubuzima bwa Sabine mu bitekerezo nk’umugore nakundaga wakuze afite imyitwarire myiza kugeza ku munsi yapfiriyeho. Nizera ko iki gitabo kizafasha buri musomyi kwigira ku butwari bwa Sabine.”

Iki gitabo yacyise “Iminsi ijana twubatse urugo”

Avuga ko impamvu ya gatatu ari ukugabanya intimba yari isabitse mu mutima we nyuma yo gupfusha umugore we utaranamusigiye umwana.

Ati “Umuganga yangiriye inama yo kwandika cyangwa guhimba indirimbo yerekana ubunebwe bwanjye ku mugaragaro.”

Igitabo mbarankuru “Iminsi ijana twubatse urugo” gifite page 170, kiboneka kuri murandasi ku mbuga zisanzwe zigurishirizwaho ibitabo nka Amazon.

Tanga Igitekerezo ukoresheje Facebook

SHARE