WDA yamuritse ibitabo bishya bizajya byifashishwa mu itegurwa n’ishyirwa mu bikorwa ry’imyigishirize y’imyuga n’ubumenyingiro

Ikigo cy’Igihugu gishinzwe guteza imbere amashuri y’imyuga n’ubumenyingiro (WDA) ku nkunga y’Ubudage bamuritse ibitabo bishya bizafasha kuyobora abategura n’abashyira mubikorwa imyigishirize y’imyuga n’ubumenyingiro bizwi nka “Quality Management Handbook”.

Ibikubiye muri ibi bitabo byateguwe ku bufatanye bwa WDA, amashuri yayo (TVET Schools), ariko ku buryo bw’amafaranga giterwa inkunga n’Ikigo k’Iterambere mpuzamahanga cy’Abanyakoreya (KOICA) hamwe na Leta y’u Budage.

Ku ikubitiro ibitabo 400 byahise bihabwa abayobozi b’amashuri ya TVET n’abashinzwe gukurikirana uburezi mu turere dutandukanye, ibindi bitabo birenga 600 bikaba birigukorwa bikazatangwa mu minsi ya vuba.

Umuyobozi Mukuru w’Ikigo cy’Igihugu gishinzwe guteza imbere imyuga n’ubumenyingiro mu Rwanda (WDA) Eng. Pascal Gatabazi, avuga ko ibi bitabo byitezweho kuzamura ireme ry’uburezi.

Yagize ati  “Iki gitabo kirimo ibintu byose byifashishwa mu burezi yaba kureba uko wategura, ibikoresho bifasha umwarimu kumenya uko ategura, bigafasha ukurikirana uwo mwarimu kumenya uko ategura kugira ngo dukomeze dukurikirane ireme ry’uburezi kandi bidufashe kumenya aho bipfira”.

Gatabazi avuga ko mbere y’uko ibyo bitabo bikorwa hagaragaraga icyuho cyo kuba umwarimu wahuguwe usanga atandukanye cyane n’utarahuguwe, kuba ibyo bitabo bije ngo bigiye kongera agaciro mu itegurwa n’imiyigishirize ndetse no mu isuzuma kuko kugeza ubu WDA imaze guhugura abantu bangana na 50%.

WDA ifite intego yo gukomeza guhugura abantu batandukanye harimo n’abayobozi b’ayo mashuri y’imyuga n’ubumenyingiro kugeza ubu bakabakaba 4500.

Umuyobozi muri Ambasade y’u Budage Inga Klunder PreuB  wari umushyitsi Mukuru yashimye WDA uburyo ikomeza gushyira mu bikorwa inshingano zayo, ishaka imfashanyigisho zitandukanye mu kuzamura ireme ry’uburezi harimo no gutegura ibitabo bigamije gufasha amashuri y’imyuga n’ubumenyingiro.

Klunder yijeje WDA ubufatanye n’inkunga kugira ngo habeho gukomeza kubungabunga no guteza imbere amashuri ya TVET mu Rwanda kugira ngo zigire uruhare ruhagije mu kuzamura ubukungu bw’igihugu.

WDA ifite inshingano ikomeye yo gukurikirana ireme ry’uburezi mu mashuri y’imyuga n’ubumenyingiro.

Umuyobozi wa WDA Eng. Gatabazi Pascal ibumoso hamwe na Inga Klunder wari uhagarariye u Budage iburyo bashyikiriza umwe mu bayobozi ba TVET igitabo.

 

Tanga Igitekerezo ukoresheje Facebook

SHARE