Adrien Misigaro na Gentil Misigaro bagarutse mu Rwanda muri gahunda y’ibitaramo bise “Each one reach one” (Amafoto)

Mu ijoro ryo kuri uyu wa Gatanu nibwo abahanzi b’indirimbo zihimbaza Imana, Adrien Misigaro na Gentil Misigaro bageze i Kigali aho baje muri gahunda y’ibitaramo bikomeye bazafatanyamo na Israel Mbonyi bigamije gushishikariza abantu gufasha ababaswe n’ibiyobyabwenge kugaruka mu nzira nziza.

Aba bahanzi basanzwe batuye muri Canada bagarutse mu rw’imisozi igihumbi nyuma y’uko bahaherukaga mu mpera z’umwaka ushize ubwo Gentil Misigaro yari ahafite igitaramo gikomeye ndetse akahava anakoze ubukwe.

Kuri iyi nshuro bazanye n’itsinda ry’abaramyi bane basanzwe bakorana muri Canada bazabafasha muri ibi bitaramo bise “Each one Reach one”.

Bakigera ku kibuga cy’indege basanganiwe n’abari baje kubakira ndetse n’abanyamakuru dore ko ari bamwe mu bahanzi bakundwa n’umubare munini w’abihebeye indirimbo zo kuramya no guhimbaza Imana.

Mu kiganiro kigufi bagiranye n’itangazamakuru bavuze ko bari bakumbuye mu Rwanda kandi bahora bahatekereza kuko ariho iwabo. Babajijwe ku mpamvu nyamukuru yatumye bagaruka i Kigali, bavuga ko ari gahunda y’ibitaramo bise “Each one reach one” biri mu bukangurambaga bwo gushishikariza urubyiruko kwirinda ibiyobyabwenge no gushishikariza abantu gufasha ababaswe n’abyo babagarura mu nzira nziza.

Adrien yagize ati “Úmwaka ushize ubwo nasuraga Iwawa nibwo nagize igitekerezo cyo kugira icyo twakora nk’abantu bumvwa na benshi tugafasha urubyiruko rutandukanye kwirinda no kwitandukanya n’ibiyobyabwenge binyuze mu muryango twatangije witwa Melody of New Hope’”.

Yagarutse ku muhanzi Fireman uri mubagororewe Iwawa ariko ubu akaba yaragarutse mu nzira nziza, avuga ko nubwo nyuma yaho yongeye gufungwa ntakintu yari kubikoraho icyingenzi nuko atari yongeye kuzira ibiyobyabwenge ndetse ngo bazakomeza gukorana muri gahunda zitandukanye muri ubu bukangurambaga.

Muri ibi bitaramo aba bahanzi bazakora “Each one Reach one” bizanyuzwamo ubu bukangurambaga, bazafatanya na Israel Mbonyi uri mu bayoboye mu ndirimbo zo guhimbaza Imana.

Igitaramo cya mbere aba bahanzi bazagikorera mu mujyi wa Kigali tariki ya 8 Werurwe 2020 muri Intare Arena. Icya kabiri kizabera muri Kaminuza y’u Rwanda, Ishami rya Huye muri Auditorium ku itariki ya 15 Werurwe 2020.

Uretse ibi bitaramo Adrien na Gentil ndetse n’ikipe bazafatanya bazasura ibigo bitandukanye bifasha ababaswe n’ibiyobyabwenge.

Bakirijwe indabo ku kibuga cy’indege.
Gentil Misigaro n’umwe mubo bazanye bazabafasha muri ibi bitaramo.

Aba bavandimwe baganiriye n’itangazamakuru.
Ku kibuga cy’indege i Kanombe bakiriwe n’abarimo abakobwa b’ikimero.
Gentil aramukanya na Fireman.
Adrien na Gentil bishimira ko umuraperi Fireman yigobotoye ibiyobyabwenge.

 

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE