Amabasaderi Olivier Nduhungirehe yakuwe ku mirimo yari ashinzwe muri Guverinoma

Kuri uyu wa Kane tariki 09 Mata 2020 ni bwo Perezida y’u Rwanda Paul Kagame yakuye Amb. Olivier Nduhungirehe ku mirimo yari ashinzwe muri Guverinoma aho yari Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe umuryango w’Ibihugu bya Afurika y’Iburasirazuba.

Itangazo ryaturutse mu Biro bya Minisitiri w’Intebe rivuga ko Perezida wa Repubulika yavanye Olivier Nduhungirehe ku mirimo ye, kubera imikorere yakunze kumuranga yo gushyira imbere imyumvire ye, aho gushingira kuri politiki ya Leta.

Iritangazo ryagiraga riti “Ashingiye ku biteganywa n’Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 116.

None ku wa 9 Mata 2020, Perezida wa Repubulika yavanye ku mirimo Amb. Olivier Nduhungirehe wari Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango w’Ibihugu bya Afurika y’Iburasirazuba kubera imikorere yakunze kumuranga yo gushyira imbere imyumvire ye aho gushingira kuri politiki za Leta mu kazi yari ashinzwe.’’

Mu mpera za Kanama 2017 nibwo Ambasaderi Olivier Nduhungirehe yagizwe Umunyamabanga wa Leta muri Minisiteri y’Ububanyi n’Amahanga avuye ku kuba Ambasaderi w’u Rwanda mu Bubiligi.

Mu 2007 yabaye Umujyanama wa mbere muri Ambasade y’u Rwanda muri Ethiopia [2007-2010] n’i New York muri Amerika.

Yavuye muri Amerika muri Gicurasi 2015 agizwe Umuyobozi mukuru w’agateganyo muri Minisiteri y’Ububanyi n’Amahanga n’Ubutwererane ushinzwe imiryango mpuzamahanga mbere yo kugirwa Ambasaderi w’u Rwanda mu Bubiligi aho yamaze imyaka ibiri.

Uyu mugabo w’imyaka 45 afite impamyabumenyi y’Icyiciro cya Gatatu cya Kaminuza (Masters) muri Gestion Fiscale yavanye muri Kaminuza ya ULB (Université Libre de Bruxelles-Institut Solvay). Afite kandi Impamyabumenyi y’Icyiciro cya Kabiri cya Kaminuza mu mategeko yaherewe muri UCL (Université Catholique de Louvain).

Nyuma yo gukurwa kuri uyu mwanya, mu butumwa Amb Nduhungirehe yanditse ku rubuga rwa Twitter yashimiye Perezida wa Repubulika ku cyizere yamugiriye mu myaka ibiri ishize akamugira Minisitiri, avuga ko yiteguye gukomeza gukorera igihugu.

Itangazo rya Minisitiri w’Intebe rivuga ko Amb. Nduhungirehe yakuwe muri Guverinoma.

 

 

Tanga Igitekerezo ukoresheje Facebook

TURAKWAMAMARIZA Niba uri umucuruzi, umushoramari, Umuhanzi n'abandi bantu bose bifuza kwamamaza, IBYAMAMARE.com turagufasha kwamamaza ibikorwa byawe bigere kubatuye isi yose kuko dusurwa n'abarenga miliyoni 2 buri kwezi, tugukorera inkuru, tukakwamamaza kumbuga nkoranyamba zacu zose harimo facebook, instagram, twiter na Youtube kandi bigakobwa gatatu mu Cyumweru ukwezi kose twamamaza ibyo ukora ndetse dushishikariza abantu kubimenya. DUHAMAGARE cyangwa utwandikire KURI Wats APP: +250 7830 35616 Cg utwandikire kuri Email : ibyamamarenews@gmail.com
SHARE